KUCHING: Inisiatif Sebela, Asi enggau Inklusiviti (D2EI) ti dipejalai di Sarawak majak mandangka asil positif lebuh mayuh agi indu diberi peluang mangku pengawa strategik ba servis perintah nengeri.
Menteri Pemansang Indu, Nembiak Mit enggau Pengelantang Komuniti Sarawak (KPWKK), Datuk Seri Fatimah Abdullah madah, Datuk Felicia Tan Ya Hua ti niki pangkat nyadi Sapit Sekretari Perintah Sarawak (Administrasyen) bepun 1 Januari 2026 mandangka pengeran Perintah Sarawak ngamat prinsip D2EI.
“Iya ti niki pangkat ari ex-Sekretari Mendam KPWKK ngagai siti ari tiga pangku pengawa pemadu tinggi ba Servis Perintah Sarawak nya pengawa ngaku enggau basa pemadu tinggi ngagai siku indu,” ku iya ba Pengerami Ngenang Jasa KPWKK di siti hotel, malam kemari.
Ku iya, unit D2EI ti ditumbuh nengah Opis Indu enggau Ruang Bilik Sarawak (JWKS) ba taun 2025 mega diaku enggau bulih sukung ari mayuh raban ba nengeri bukai.
“Maya ngintu Hari Indu taun tu, kitai mega deka mandangka sekeda pemujur ti udah dijapai nengah inisiatif nya,” terang iya.
Nya kebuah, Fatimah nyemetak madah ke pengawa nyiri Felicia deka nentuka raban diselinting nengah opis menteri nya terus nerima perati ti patut ba renggat administrasyen pemadu tinggi nengeri dikena nyamin pengelantang sosial rayat Sarawak.
Ba pengerami sebaka, iya mega meri terima kasih ngagai ex-Direktor JWKS, Salmah Jobeli ke pengeran negap agenda pemansang indu enggau ruang bilik kelimpah pegawai ti udah belidar gawa tauka abis timpuh gawa.
Nipak pemansang nya, Fatimah mega ngarap 11 pangku pengawa puang nengah opis menteri enggau ejensi nya ulih diisi lengkas nentuka pengawa nyendia servis ngagai rayat terus lanchar.
“Bisi 11 pangku pengawa puang di JWKS kelimpah sekeda pangku pengawa bukai ti apin diisi berindik ari belidar gawa enggau niki pangkat pegawai,” ku iya.
Taja napi penanggul suntuk staf, iya muji pengeran raban KPWKK enggau ejensi nya ti sanggup gawa lebih jam sereta ngereja mayuh pengawa nentuka servis ngagai rayat enda tejanggal.
“Tiap pemujur opis menteri negap sistem nyaga sosial, negap indu, nambah pengelantang komuniti enggau ngerembai akses pelajar tumu nembiak mit nya asil kerejasama semua.
“Aku chukup beterima kasih ngagai raban opis menteri ti sanggup gawa ngelui ari pangku pengawa diri, napi pemar enggau penuh profesionalisme sereta semampai ngemerat pemaik raban diselinting ba tiap pengawa ti dikereja,” ku iya nyemetak.
Iya mega ngingatka semua raban opis menteri anang berasai lantang enggau pemujur ke bisi diatu tang meseti naka ulih ngemanah pengawa ngenatai servis ngagai rayat.
“Entara pekara ti mujur dikemanah iya nya timpuh ngadu Bantu Indai Baru Beranak (BIB) mujur diinsur ari kira tiga bulan ngagai urung dua minggu aja ungkup peminta ti udah genap.
“Pengawa ngemanah tu ukai semina nambah penyikar nyendia servis tang mega nentuka bantu diagih ngagai indai ti patut nitih pematut enggau maya sida chukup begunaka nya,” terang iya.
Ku iya, pemujur nya mandangka pengawa ngemaru atur gawa enggau ngena teknologi ulih meri pemaik ngagai rayat. Fatimah mega nyemetak madah, kerejasama entara ejensi entara pekara beguna mutar mayuh isu sosial ti majak kompleks.
