Mayuh jalai alun di Engkilili enda likun ditengah

KUCHING: Mayuh jalai alun di sitak Engkilili chukup mar sereta enda likun ditengah mensia mayuh ti suah berundang gawa ninting hari, ku Kaban Kaunsil Nengeri (Adun Engkilili-PSB), Dr Johnichal Rayong Ngipa.

Nya alai, iya minta perintah ngemanahke agi jalai sereta ngaga jalai baru ba sitak tu laban mayuh jalai alun baka ba kandang menua Ulu Skrang agi tubah nujah jalai tanah.

“Entara jalai ke meseti dikemanah baru iya nya jalai ari Rumah Jabu Nanga Tebat terus ke Nangah Belaie, Sungai Pinang, Sg Darai, Ng Kujoh, Sg Akop, Ng Tabau, Panchor enggau Ng Mejuau, Ulu Skrang.

“Pia mega, patut dikemanah iya nya jalai batang ari simpang Sebeliau nuju ke simpang rumah panjai Merutih/Rh Dau Ng Entalau/ SK Nanga Entalau lalu rembus ngagai rumah panjai Ng Empran,/Panchor/SK Ng Menjuau/ Rh Lidom Sungai Paya, Ulu Skrang.

“Bela minta dikemanah jalai iya nya peranak Rh gait, keranggas enggau Rh Bellisan Tinting Pisang, nengah jalai Ulu layar/ Rantau Lelayang/ Bukit Sadok.

DR JOHNICAL RAYONG NGIPA

“Enda tinggal jalai jai ke dikemana rayat iya nya jalai ke Rh Tawie Ng Belawan/ Rh Chunggat Ng Pulau, Rh Siggan Nanga Pelo enggau Rh Nyandang Ng Akop Ulu Skrang.

Iya madah munyi nya rambau bejuraika mosyen Meri Basa Ngagai Jaku TYT rambau bejadika Aum Dun Ke-18, kemari.

Pia mega penusah ke ditapi rayat ba menua pesisir di pelilih Batang Ai Ili Engkilili minta jalai ba menua sida iya disambung ngagai bandar Sri Aman nengah Ensurai, Basi, Leo/, Tekalong, Tanjong, Langkang, Tawai, Ijok, Pak enggau Sengkabang.

Udah nya, ngemanahka jalai sawit SALCRA ke besambung ngagai rumah panjai Nibong, Titok Ulu, Titok Ili enggau Bunu dalam sitak San Semanju.

Jalai bukai baka ngemanah baru jalai SK Nanga Empelam nuju ke Geligau Ili, Geligau Ulu ngambika ulih besambung ngagai rumah panjai ke besemak baka Spalau enggau Rh Nayang ke bepalan semak Sungai Batang Ai Ili, Engkilili.

“Mayuh jalai tu dikena mensia mayuh ke diau ba sitak Engkilili bejalaika pengawa besehari-sehari baka betanam, bekebun, nganjung anak besekula enggau pengawa bukai,” ku iya.

Nangkanka nya, iya madah penanggul nadai bekal ai beresi enda kala mutus nuntung mensia mayuh ba sitak nya.

“Penanggul tu balat agi nuntung bala mayuh ba dia lebih agi lebuh musim kemarau.

“Nya alai, aku minta perintah nengeri nyambung Projek Bekal Ai Beresi ngagai selampur rumah panjai ba menua nya berengkah ari Enteban ngagai Sungai Paya nyengkaum sekula ba sitak nya,” ku iya.

Enggau pemisi jalai alun ti manah ba sitak nya, pengawa bejalaika projek tu ulih digaga enggau muntang.

Suara Sarawak