KUCHING: Majlis Bandaraya Kuching Selatan (MBKS) deka nungkap pengulih penerebai terus entara Sarawak enggau mengeri bakih sida di China.
Datuk Bandar Kuching Selatan, Datuk Wee Hong Seng madah, penerebai terus entara kededua palan nya beguna amat dikena ngeranchak sektor ekonomi enggau dagang temuai.
Nya alai, ku iya, pejalai penerebai nya patut ditungkap silik ngambi meruan.
“Sarawak deka ngembuan serikat penerebai kediri empu tang kitai semina bisi siti aja. Di China, nyau deka semua wilayah sida ngembuan serikat penerebai kediri empu.
“Nya alai, kitai patut meda ari sukut kededua raban tu. Kami deka mantu sida. sekeda pejalai ti diperembu kitai, tu meseti meruan,” ku iya.
Wee mansutka jaku nya pengudah ngulu Aum Datuk Bandar serimbai Forum Kerejasama Malaysia (Sarawak)-China di sebuah hotel ditu, kemari.
Nangkan nya, iya madah, MBKS deka nyadi palan sekali ngetu ba pengawa ngatur semua tanya bekaul pengawa nyeraris pekara nya.
“Kami bela betulung. Sebarang pekara ti diguna sekali ke nya pengawa besilih teknologi tauka utai bukai, kami ngumbai nya palan sekali ngetu.
“Nya alai, kami naka ulih mantu sekali ke sida datai ungkup beranakka puku tauka kitai deka beranakka puku di menua sida,” ku iya.
