MIRI: Kaunsil Mengeri Miri (MBM) enggau Borneo Parking System (BPS) Sdn Bhd seruran chakah meri peneleba sistem aplikasyen ngengkah entukar digital pemadu manah ungkup bala deriba ba Miri.
MBM ba sebengkah penerang madah, raban sida bejalaika inisiatif nya dikena ngemanah ke agi sistem ti endang udah bisi sereta ngalih ngagai sistem aplikasyen ti manah agi iya nya BorneoPark Miri 2.
“Kami mereti tebal agi penguna agi ngena aplikasyen lama iya nya Borneo Smart Parking tang kami (MBM) seruran deka meri servis pemadu manah enggau ngemantupka ati rayat.
“Nya alai, MBM minta bala penguna lengkas ngalih ngagai sistem aplikasyen ngengkah entukar digital pintar ti baru iya nya BorneoPark Miri 2.
“Sukung enggau kerejasama ari semua penguna beguna amat dikena ngemujur pengawa ngalih ngagai renggat tu,” ku penerang nya.
Taja pia, MBM mereti bisi sekeda penguna nyangka agi ngembuan laluh kredit ba aplikasyen lama.
Nya alai, MBM meransang penguna ngena laluh kredit nya sebedau 31 Disember tu tauka ngelawa BPS ti bepalan ba Palan Transformasyen Mengeri (UTC) Miri dikena mindahka laluh kredit nya ari aplikasyen lama ngagai aplikasyen baru.
Aplikasyen BorneoPark Miri 2 ulih diturun ari Google Play Stor enggau Apple App Store.
Mensia mayuh ti deka nemu silik bekaul pekara nya diperansang betelefon terus ngagai lumur 085-418734.
