KUCHING: Mensia mayuh ulih meli koleksyen sampul mirah Taun Baru China (CNY) 2024 ti mandangka gambar Regata Perau Naga Antarabansa Sarawak belabuh 16 Januari tu.
Sampul mirah tauka disebut angpau Kaunsil Dagang Temuai Sarawak (STB) edisyen ketujuh nya udah bisi ba palan penerang temuai STB ba Kuching, Sibu enggau Miri.
Ku Tuai Pegawai Eksekutif STB, Sharzede Datuk Salleh Askor, gambar sampul mirah nya ditibak ari Regata Perau Naga Antarabansa Sarawak enggau mantaika elemen nyelai ba nengeri tu.
“Kami ngarapka gambar angpau Sarawak ti baru enggau nyadi koleksyen ninting taun seraya ngelaku biodiversiti enggau pesaka asal Sarawak ti chukup berega ngagai dunya,” terang iya.
Nangkan nya ku Sharzede, naga nya lambang pengering, kuasa enggau untung dalam mitologi Cina ti bisi besangkut paut enggau regata ari semangat naga dalam ati bala pengayuh perau.
Semangat naga nya ngalih ngagai genap dram ti dipalu meransang pengayuh kering enggau deras agi bekayuh seretai nunjukka sida seati, ku iya.
Pekit Regata Perau Naga Antarabansa Sarawak nya pekit diaku ba renggat antarabansa ke alai tim lokal enggau menua luar bepekit ngerebut perais mata duit enggau trofi ba kandang Sungai Sarawak.
Tebal agi diatur ujung bulan Oktober ungkup kategori lelaki, indu enggau champur lalu lebuh pekit nya taun nyin tadi, keterubah iya ngelalu tim pengayuh ari Orang Nyelai Pendiau (OKU).
Bisi 60 tim ari 20 menua ngambi bagi nyengkaum ari Australia, China, Hong Kong, Indonesia, Ireland, Jipun, Kazakhstan, Qatar, Sepanyol, Brunei, Singapore enggau Malaysia.
Ungkup penerang silik bekaul aktiviti dagang temuai Sarawak tau dipeda ba website Lembaga Pelancongan Sarawak: https://sarawaktourism.com.
