MUKAH: Tim Malaysian Global Taekwandi Federation (MGTF) Sarawak mujur mai pulai empat midul emas, siti pirak enggau tiga engkeraju ba Sabree Salleh Open and Invitational Taekwondo Championship ti diatur ba Balai D’Cerana Indu Opis Polis Kontinjen (IPK) Selangor empai lama.
Tuai Jurulatih Kelab Taekwondo Tunas Mukah, Zaidi Morshidi madah, sida semina nganjung lapan penyereta, dua pegawai enggau siku jurulatih ba pekit nya.
“Aku enda nyangka ulih mai pulai empat midul emas laban kami semina nganjung lapan penyereta aja.
“Alhamdulillah, penyulut tu mih nyadi bukti kitai ulih besemekih enggau penyereta bukai,” ku iya rambau dirandau Suara Sarawak.
Terang iya, pekit sekali tu renggat ketiga pengudah pekit sebaka diatur ba Ipoh enggau Sibu sebedau tu.
Nangkan nya, Zaidi beterima kasih ngagai Press Metal Sarawak laban meri bantu baju T, uniform taekwondo enggau tanchut panjai ngagai raban nya.
Ku iya, bantu nya meri pengeransing ngagai bala penyereta ngereja pemadu manah sepanjai pekit nya diatur.
Ngelansa pasal penyulut nya, iya madah, ungkup kategori Pattern, midul emas diulih Mohamad Helfy Danish Mohamad Zamri enggau Elizabeth Sandra Petrus lalu Rifqi Rosidi bulih midul pirak.
Ungkup kategori Sparring, midul emas diulih Mohamad Amir Haziq Hamdan enggau Mohamad Helfy Danish Mohamad Zamri lalu midul engkeraju diulih Rifa Rosidi, Rifqi Rosidi enggau Muhammad Alif Aidit Mohd Zaidi Adrus.
Dulu agi ari nya, bisi 850 penyereta ari selampur Malaysia masuk ba pekit nya.
