BINTULU: Michelle Irau Kut dipadu ngempu gelar Kumang Gawai Dayak Bintulu 2023 Renggat Bagi Menua Bintulu ba sebuah hotel tebilang, malam Hari Enam tu tadi.
Nengah gelar nya, iya mujur mai pulai perais mata duit RM2,000 besereta trofi, jumpang, selampai enggau setipikit.
Michelle mega deka ngarika Bagi Menua Bintulu ngagai Pekit Kumang Renggat Sarawak.
Gelar Lulong dipenggi Debbie Chan May Lynn lalu nerima mata duit RM1,500 sereta trofi, selampai enggau setipikit.
Seraya dara bajik benama Evanatasha Said ngempu gelar Selinggar Matahari Gawai Dayak Bintulu lalu mai pulai perais RM1,000 sereta trofi, selampai enggau setipikit.
Bisi enam pemekit masuk Pekit Kumang Gawai ba Pengerami Makai Lemai Mantar Gawai 2023 Renggat Bagi Menua Bintulu ti udah dipenyadi Menteri Industri Pemakai, Komoditi enggau Pemansang Wilayah Sarawak ke mega ADUN Kemena Datuk Sri Dr. Stephen Rundi Utom sereta bini iya, Datin Sri Loreta Sawot.
