PUTRAJAYA: Minyak makai lama ulih diproses nyadi produk baru ti berega tinggi kelimpah ulih muka peluang nambah penatai pemisi ruang bilik.
Sapit Menteri Besai ke mega Menteri Pengawa Bekebun enggau Komoditi, Datuk Seri Fadillah Yusof madah, minyak makai lama ulih nyadi utai mata dikena ngasil biominyak tauka Minyak Bilun Meruan (SAF).
“Berindik ari nya, Program Ngumpul Minyak Makai Lama tu ukai semina ulih nyapai juluk pemeruan sereta meri rega tambah ngagai rentayan bekal industri sawit aja.
“Program tu mega deka meri empas positif ngagai rega minyak sawit seraya nambah penatai pemisi pekebun mit,” terang iya.
Fadillah nyebut pekara nya lebuh bejaku ba Pengawa Bejadi Pogram Ngumpul Minyak Makai Lama ti diatur Opis Menteri Pengawa Bekebun enggau Komoditi (KPK) begulai enggau PETRONAS ba Stesyen PETRONAS Putrajaya 1, Presint 9 ditu, kemari.
Iya nambah baru, minyak makai ti udah suah dikena nguring enda diperansang terus dikena laban iya ulih ngeruga pengerai.
Berindik ari nya, ku iya, minyak makai lama meseti dikena enggau manah lalu enda patut dibuai ke dalam singki tauka dituang ke dalam parit tauka dibuai ke dalam tung sampah laban iya ulih ngalit paip ti ujung iya beguna ke ungkus tinggi dikena nyeleti iya.
“Nya alai aku minta semua rayat Malaysia sama-sama ngena baru minyak makai lama ke nyadi siti chara pintar ti ulih meri pemaik ngagai pun penatai pemisi kitai,” terang iya.
Bejaku senentang Program Ngumpul Minyak Makai Lama ba Stesyen PETRONAS, Fadillah madah program nya endang siti pengawa dikena nambah penyedar mensia mayuh ngambi nyaga rampa menua kelimpah ulih nambah penatai pemisi ruang bilik sereta ngemansang pengulih ngasil biominyak meruan dikena ngurang tikas gas rumah gadung (GHG) ti dilepas.
“Dikena ngemuntangka pengawa ngatur minyak makai lama nya, PETRONAS deka milih sekeda stesyen PETRONAS nyadi Palan Ngumpul Minyak Makai Lama ngambi ngemuntang mensia mayuh nganjung sereta nyual minyak makai lama.
“Keterubah iya, palan ngumpul tu deka belabuh ba Stesyen PETRONAS 1, Presint 9, Putrajaya, Stesyen PETRONAS Subang Bestari enggau Stesen PETRONAS Kota Kemuning 1, Shah Alam, lalu palan nya deka dikerembai berenggat ngagai selampur menua ngaul stesyen PETRONAS ti dipilih,” ku iya.
Ku Fadillah agi, program ngumpul minyak makai lama nya ukai semina dikena ngatur laluh minyak makai enggau manah tang mega dikena ngemansang pengulih ngubah minyak makai lama ngagai biominyak penerebai.
Program ngumpul minyak makai lama nya mega endang pengawa proaktif PETRONAS ngambi nyikap diri bedagang minyak penerebai meruan dikena nangkup peminta Skim Nimbang enggau Ngurang Karbon ungkup Penerebai Antarabansa (CORSIA), ku Fadillah.
“PETRONAS diatu mega deka ngaga kilang napis bio dikena ngasil biominyak SAF ba RAPID Pengerang, Johor belabuh ba taun 2024 lalu dipelaba tembu ambis ba taun 2026,” ku iya.
