KUCHING: Pekit Miss International Sarawak ti keterubah deka diatur nyadi insiatif ngasi ba pengawa mandangka pemajik, penau enggau ngelakuka pesaka main asal.
Pia mega, pekit nya diatur dikena negika isu mensia nyengkaum pelajar enggau nyadi pelasar dikena mantaika sada raban ti mit.
Nya alai, Sarawak begulai enggau Sabah sereta Semenanjung Malaysia diberi hak ngatur, milih enggau mantaika penyereta ba renggat nasional.
Lebih manis, pengari ti dipilih bepeluang bepekit ngarika menua ba panggau antarabansa ba Tokyo, Jipun ti deka diatur ba bulan Oktober tu ila.
Direktor Nengeri Miss International Sarawak, Datuk Raymond V. Lolly madah, pekit ratu bajik nya ukai semina pekit aja tang dikena ngerami pupu bansa ti bungkur semua.
“Kitai pechaya pemajik datai ari semua sukut nyengkaum raras tubuh enggau chura kulit lalu kitai deka nyendia pelasar ngagai raban indu ari mayuh penatai mandangka penau sida,” terang iya.
Iya madah, Miss International Sarawak meri perati ngagai komuniti nengah bemacham sukut servis komuniti dikena nempa pelasar ratu bajik.
“Pekit Miss International tu diatur Gerempung Main Asal Antarabansa ti keterubah diatur ba taun 1960 bepalan ba Jipun.
“Tu sebengkah pekit keempat pemadu besai ba dunya ari sukut pemayuh pemenang menua ti masuk pekit antarabansa tu.
“Kitai merambu deka nanggam kaul enggau organisasyen sereta sida ti chakah meri empas positif ngagai komuniti,” ku iya.
Raymond mansutka jaku nya rambau aum pemberita ba Aras 1, Juma’ani Pavilion, Vista Tunku ditu, kemari.
