Missha udah ninga, asil bantu kereban Implan

KUCHING: Missha Teng, umur 5 taun siku ari enam nembiak mit ti udah mujur dibantu ulih ninga munyi ngena kereban Implan Audiotori Pun Untak.

Nitihka penerang ari indai iya Angelia Lim, Missha keterubah ditemu enda ninga tauka benggal maya beumur dua taun.

“Lebuh agi mit iya enda mereti utai disebut kitai semina merati aja.

“Maya nya kami ngumbai iya sigi lubah nemu bejaku,” ku iya.

Angelia lebuh ditanya pemberita madahka amat mar bejaku enggau Missha laban nembiak nya kebendar sigi benggal pending sepiak kiba.

“Pending sepiak kanan iya ulih ninga enti nyawa kitai inggar.

“Nya kebuah iya ngena perengka peninga ba pending kilah kanan lalu dipasang ngena implan ba pending sepiak kiba,” ku iya.

Missha bepun ngena implan ba bulan Disember 2017 maya iya beumur tiga taun lalu belatih bejaku nangkan nya seminggu sekali.

Diatu iya udah ulih bejaku enggau meruan lalu masuk sekula tadika baka nembiak ti nadai penimpang.

Ku apai Missha, Michael Ting iya amat irauka pendiau Missha lebuh udah besai deka ngatika diri jemah.

“Taja kami takut enggau implan tu maya nya tang laban ngenangka pengidup iya jemah, nya kami nguji sereta beterima kasih ngagai Tuhan pengawa nya mujur,” ku iya.

INFO GRAFIK