Mobile ATM kena mutar penanggul nadai ATM

KUCHING: Mobile ATM tauka bank ke ulih mindah tau digaga ngambika ulih dikena mutarka penusah nadai ATM ba menua mit.

Adun Engkilili Dr Johnical Rayong Ngipa madah, pekara tu patut bendar diperatika piak bekaul dikena nyaup mensia mayuh ke jauh ari pasar.

“Ambika banding diatu bisi servis mindah kin kitu nyengkaum librari, servis pengerai sereta mayuh ke bukai agi.

“Nya alai ba penemu aku, mobile ATM tauka servis bank mindah kin kitu tau digaga ungkup menua mit ngambika peranak dia enda kiruh bepintaka permit bejalai ke mengeri bukai maya Atur Mindah Betagang (PKP),” ku iya, tadi.

Iya mantaika penemu nya lebuh ditanya sentang berita madahka urung 100 iku peranak berintai nganti gintir minta permit mindah ari Opis Polis Pakan, ensana.

Sida dipadah minta permit nya dikena ngalu ke pasar Sarikei bebelika barang sereta deka ngambi duit ba ATM.

Pekara tu ngujungka mayuh penemu ari orang luar tebantai kelebih agi bekaul enggau sebana peranak menua Pakan ti nadai bank ba pasar sida.

Suara Sarawak