KUCHING: Pemar ditapi meraka dua garis entara menua iya nya Temburong, Brunei enggau Limbang, Monica Tamin ari Lawas ketegal keran datai kitu nyual kuih gelang ngambika dikelala mensia mayuh ba Agrofest Sarawak 2019 ti benung diatur maya tu.
Ku indu bansa Lunbawang tu, kuih gelang iya sigi dikedeka nembiak mit laban ngempu asai krim ti bebida nitihka peminta pemeli.
“Aku bepun dagang tu laban sigi rindu enggau bisi peneleba laban kala gawa enggau ‘Dunkin Donuts’ kenyau 13 taun ti udah lalu.
“Penyelai kuih gelang aku ari krim ti nyelai ari orang bukai laban digaga aku empu,” ku iya.
Iya bejaku munyi nya ngagai Suara Sarawak maya hari keterubah Agrofest Sarawak berengkah nyin kemari.
Kelimpah kuih gelang, Monica mega bisi nyual ‘muffin’ enggau ‘cup cake’.
Lebuh nyerita pasal pun pejalai dagang kenyau 13 taun ti udah lalu, iya kala tekena maya tusah lebuh nadai orang meli kuih gelang.
“Lawas sebuah pelilih ti mit lalu orang ti datai kia bebeli barang nadai mayuh.
“Nya kebuah aku nyekat diri ngaga kuih gelang tu ngagai 100 igi sehari.
“Tang baka ke sehari tu (ensana) aku berasai gaga laban urung 300 igi kuih gelang aku udah abis dijual enggau rega RM2.50 siti,” ku iya gaga.
Tambah iya taja Lawas pasar ti mit tang pengulih ti diulih ninting bulan manggai RM30,000.
“Dagang tu ngasuh aku enda ngetu sereta tan ati.
“Aku arapka jemah ila, aku ulih nyual kuih gelang ngagai menua luar taja pan nengah dua buah garis entara menua.
“Pemeli kuih gelang aku mayuh nembiak mit laban sida rindu meda kuih gelang aku mayuh chura sereta nyamai,” ku iya seraya ketawa gaga.
