KUCHING: Kelia nadai perengka baka pinggai, sudu enggau kontena nya alai maya nya orang ngaga tungkus bekal ari daun buan, ku Jirim Ngaku lebuh ditanya pasal pemakai Bidayuh ti dikumbai ‘Mos Tubi’.
Jirim, siku indu Bidayuh beumur 56 taun madah ‘Mos Tubi’ sebansa pemakai lama sida ti agi dikembuan nyentuk diatu taja jeman udah berubah.
“Mos Tubi sebengkah asi bungkus ti dibalut ngena daun buan, agi digaga kami nyentuk diatu laban tu pemakai bansa asal Bidayuh.
“Kelia lebuh bala sida deka nurun ke umai enggau kebun sida nadai perengka dikena mai bekal baka pinggai, sudu, kontena, bisin enggau perengka bukai ti dikemisi kitai diatu nya alai sida ngaga bekal asi ari daun buan,” ku iya.
Jirim madah pekara nya lebuh ditanya Suara Sarawak ba pengerami Hari Gawai Dayak Renggat Nengeri di Bau bulan June tu tadi.
Ku iya, asi ‘Mos Tubi’ tu bau angi agi ari asi ti disumai dalam periuk.
“Asi deka disumai dulu ngena periuk, udah mansau baru asi nya deka dibungkus ngena daun buan.
“Bau asi ‘Mos Tubi’ wangi agi ari asi disumai dalam periuk kelebih agi asi mirah,” ku iya.
Kelimpah ari nya, iya madah asi ti dibungkus ngena daun buan tu senang diempa sereta nyamai dibuai sereta enda ngachau rampa menua.
Nangkan nya, bakih Jirim iya nya Shanti Muzaidi, 41 taun madah iya ngaga asi ‘Mos Tubi’ tu nyadi dagang laban mayuh bulih peminta ari orang bukai.
“Aku ngaga ‘Mos Tubi’ tu nyadi dagang laban meda mayuh peminta ngagai asi tu kelebih agi maya musim pengerami baka Gawai Dayak enggau hari besai bukai.
“Kelimpah ngaga nyadi dagang aku mega ulih mantaika pemakai adat asal bansa Bidayuh ngagai bansa bukai,” ku iya ti ngempu Shanti Catering di Bau.
