SARIKEI: Mensia mayuh begau pengudah sebuah motosikal bansa Modenas angus ba tengah pasar Sarikei lemai kemari.
Nitihka penerang ari Palan Operasyen Bomba Nengeri Sarawak, piak sida nerima kangau telefon nengah MERS 999 ari mensia mayuh urung pukul 5.52 lemai.
FRT BBP Sarikei ngena kereban EMRS enggau 10 raban bomba diketuaika PBK II Bakar Bujang berumban ngesah ngagai endur penusah nyadi.
“Lebuh datai dia, api ti nganguska motosikal nya udah dipadam orang benama Bahrin ngena kereban pengerara api sereta disaup bala bukai.
“Bodykit enggau penuduk motosikal angus lengis. Taja pia nadai penusah bebadi nyawa diripot nyadi,” terang iya.
Pengempu motosikal, Jackson Sadal Anak Oliver beumur 26 taun diripot nadai apa nama.
Operasyen tembu urung pukul 5.58 lemai pengudah raban bomba meresa gaya motosikal enggau pengelikun endur nya.
