KUCHING: Kaunsil Lada Malaysia (MPB) udah negapka kaul kerejasama pemansik, kualiti enggau pemansang lada burak nengah pengawa nyain Sempekat Pemereti Ati (MoU).
Pia mega, MPB udah nyain sempekat enggau tiga ejensi baka Unimas Holding Sdn Bhd, Ejensi Angkasa Malaysia (MYSA) sereta Universiti Teknologi Swinburne Sarawak.
Willie mega penyandang Parlimen Puncak Borneo udah ngemataka pengawa nyain MoU ke udah diatur lebuh bejadika Pengerami Lada 2022 ba Hotel Waterfront ditu, ensanus.
Keterubah, MPB nyain MoU enggau Unimas Holding bekaul aplikasyen Internet of Thing (IoT) ba pemansut lada burak lalu nanggam MoU enggau Mysa nentuka kar nanam lada bedandang besai di selampur Malaysia.
MPB mega nanggam kerejasama enggau Universiti Teknologi Swinburne ba tiga projek pemansik baka pemansut lada sereta guna lada dalam industri.
Ba pengawa nya, Willie nyuaka Skim Turu Pedagang Lada ngagai tiga penerima baka Zias Catering, Sophia Taha Holding Sdn Bhd enggau Leni Spice Sdn Bhd.
Udah nya, Willie nyuaka anugerah ngagai enam penerima baka MDG Global Sdn Bhd nerima Anugerah Penyulut Eksport Produk Lada Nambah Rega 2020.
Pia mega, Ngerantar Galau nerima Anugerah Pekebun Lada Pemadu Nyulut 2020 lalu Chai Fook Yau nerima Anugerah Pekebun Lada Pemadu Manah 2021.
Nambahka nya, Syn Ming Kong nerima Anugerah Penyulut Eksport Produk Lada Tambah Rega 2021, Sophia Taha Holding Sdn Bhd nerima Anugerah Pemansut Produk Lada Inovatif 2021 sereta Tuing Panting nerima Anugerah Pekebun Lada Pemadu Nyulut 2021.
Sama datai Chairman Kaunsil Mengeri Padawan (MPP), Lo Khere Chiang, Sapit Sekretari, Mad Zaid Mod Karli, Chairman MPB, Baharuddin Datuk Mokhsen, Direktor MPB, Dr Abang Azhari Hadari enggau ke bukai.
