KUCHING: Program baru ti bekaul enggau pekara nyumai, pemajik gamal, ngurut enggau spa sereta bejait nyadi fokus perambu Opis Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit begulai enggau Malaysia Productivity Corporation (MPC).
Dalam penerang media kemari, MPC udah ngelala peluang ti besai bekaul enggau opis menteri nya kelebih agi pekara meri latih.
Pia mega, sida deka mansik peluang baru ti bekaul enggau produktiviti sereta inovasyen.
“Pekara nya nyengkaum latih dalam online baka ‘Business Webinar Virtual Advisory Clinic’ (VAC), ‘Virtual Mentoring’, ‘Virtual Coordination’ enggau ‘Virtual Training’.
“Program tu endang deka mantu orang dagang enggau pedaja dalam negapka strategi makit sida ti kena pangka laban Atur Tagang Pejalai (PKP) nyin kemari,” ku penerang nya.
Kelimpah ari nya, MPC mega deka meri servis lalau, latih enggau matau serikat mit enggau jelan pemesai (PKS) nyengkaum mantu ngerembaika operasyen dagang sida.
Ku penerang nya madah, bantu tu diberi pechuma dalam online entara orang dagang ti dipilih enggau Pakar Industri ti dichiri MPC.
Entara latih ti deka diberi nyengkaum dagang digital, ngaga chap enggau makit, chara ngurus barang ti dijual, chara ngurus sumber manusia, latih operasyen dagang enggau chara nyaga duit dagang.
Dalam Langgur Pemansang Malaysia Lumpar ke-11 (RMK11) PKS diperansang ngena mesin sereta inovasyen dikena ngelengkaska servis sida.
Perengka guna ti lebih manah deka ngasuh PKS muntang maju sereta jampat ngatur komersial produk enggau servis ngagai makit luar.
Pekara tu dikerandau entara Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit Datuk Seri Fatimah Abdullah enggau Ketuai Direktor MPC Datuk Abdul Latif Abu Seman lebuh penemuai basa MPC ngagai opis menteri nya kemari.
