MPP agi nadai ngeluar saman bekaul atur tagang nginsap

KUCHING: Bala mayuh nerima enggau manah tagang nginsap ba kedai makai, ku Chairman Kaunsil Mengeri Padawan (MPP) Lo Khere Chiang.

Lo enggau nya madah agi bisi bala mayuh lebih agi sida ke nginsap bebasa ke pengerai orang bukai.

“Taja mayuh sida ke nginsap enda nyukung tagang tu dipejalaika, tang agi bisi sekeda sida ke nginsap bebasa sida ke enda nginsap.

“Nadai pengawa neritka atur digaga diatu, tang bala myuh lebih agi sida ke nginsap tetap nyukung tagang nginsap ba kedai makai tu dipejalai,” ku Lo lebuh datai ba pengawa Begulai enggau Rayat diatur Raban Indu enggau Nembiak SUPP di Kampung Haji Baki, kemari.

“Naka ke diatu, nadai saman diterit ngagai sida ke muka kedai makai ba pelilih menua dipegai MPP.

PROJEK RTP… Lo begulai enggau Suboh Hamid (tiga ari kanan) ti ditulung nengah program ngemanah rumah rayat seranta Sarawak di Kampung Haji Baki.- Gambar Aliff Noni

“Tu seriris enggau timpuh enam bulan keterubah dikena ngajar sereta meri penyedar ngagai sida ke iban awakka enda nginsap ba kedai makai,” ku Lo.

Taja timpuh enam bulan keterubah bedau datai ba pengujung, tang nya nunjukka ubah ti mandangka kita enda begunaka undang-undang mejal sida ke nginsap nya berubah, ku Lo.

“Nitihka atur, sigi patut kitai meri kompaun ngagai sida ke ngelanggar tagang nya udah timpuh enam bulan.

“Enti orang mayuh gaga enggau chara ke diatu lalu kita ulih terus meri ajar pasal tagang tu, asai ku enda ibuh kitai nyaman sida ke ngelanggar tagang insap tu,” ku Lo.

Ku iya nambah, taja pia, nya enda nyadi kebuah kitai patut nutup mata ngagai sida ke nginsap ti ngelanggar tagang nya.

Sarawak bejalaika tagang nginsap ba kedai makai nengah chara berenggat bepun ari 1 Mac ti meri fokus lebih agi ngagai sukut ngajar sereta meri penyedar ngagai sida ke nginsap bekaul enggau atur baru nya.