Mummy Patz Dayak Cafe

Bisi ngenahka bemacham pemakai asal Dayak baka ke disumai ba rumah panjai

“Kelia lebuh makai ba kedai luar pedis amai asai aku ngiga pemakai bansa kitai Dayak. Nya ti ngasuh aku berunding deka nguji nyual pemakai lauk Dayak ba kedai.”

KOTA SAMARAHAN: Dagang pemakai sigi siti ari dagang ti cukup manah makit diatu. Tang ba kitai bansa Dayak kelebih agi bansa Iban, dagang pemakai Dayak agi kurang.

Nya kebuah pemakai kitai Dayak mayuh enda dikelala nembiak rebak baru. Tu ngasuh bansa kitai tusah deka ngetan ke chara pengidup sentang pemakai asal bansa kitai kelia laban nembiak diatu teleba agi makai pemakai bansa bukai.

Patterilla Augustine, 52 taun, asal ari Betong siku ari indu ti chukup kemerah dikelala mensia mayuh asil ari nyual pemakai Dayak kenyau ari taun 2011 menya.

ARAP TERUS MUJUR : Patz Mering siku ari indu Iban ke chukup mujur ba pengawa dagang pemakai.

Chakah bekunsi ke gambar lauk ti disumai ninting ari ba media rama diatu iya bisi lebih 5000 kelala ari mua bup tauka ‘facebook’.

Ukai semina nya aja, diatu iya mega siku ari bansa Iban ti udah mujur muka siti kedai makai diberi nama ‘Mummy Patz Dayak Cafe’ di Uni Central, Kota Samarahan.

Ngena nama timang Patz Mering, Suara Sarawak sempat ngambi awak maya iya ke benung kiruh mela temuai ke datai makai ba kedai iya apin lama ke udah.

“Taja enda nyamai tang aku udah ngaga pengabis manah engau lurus ati’ ku munyi jaku ke dipansut ke dikena ngepunka randau.

Pia mega iya madah ke lauk ke disumai sebaka baka enggi orang bukai tang iya tetap nguji ngaga kediri bemacam bansa lauk bepelasarka pemakai bansa Dayak Iban.

Undang enggau ikan disumai gulai terung Dayak

Kualiti lauk beresi sereta likun

Ngaku diri enda landik nyumai tang Pats Mering madah kediri tetap manduk lauk enggau ati ti lurus serta siru ngambika kualiti lauk iya beresi sereta likun diempa.

Laban seruran nitih ke laki iya gawa kin kia serata menua Sarawak diak iya ulih nyepi pemakai Dayak ba endur bukai lalu bulih penemu nyumai pemakai nya serta nguji ngaga kediri.

Lebuh ti nyerita pasal jalai ngepun ke dagang pemakai Dayak tu iya berasai sinu serta gaga laban juluk ati deka muka kedai makai ‘Mummy Patz Dayak Cafe’ udah dijapai.

“Kelia lebuh makai ba kedai luar pedis amai asai aku ngiga pemakai bansa kitai Dayak. Nya ti ngasuh aku berunding deka nguji nyual pemakai lauk Dayak ba kedai.”

Manuk kari

“Keterubah bejual aku semina nagit lima iku aja orang nguji makai lauk ti dijual aku, tang sehari nya aku teulih ke 15 iku orang. Nya meh terubah aku ransing ati deka ngemaju ke dagang pemakai lauk dayak tu” ku Patz Mering seraya ketawa lebuh ngenang pun ya bedagang menya.

Bepun ari stall mit di King Centre

Bepun ari nyuwa siti ‘stall’ mit ba King Centre, Tabuan Dayak kena taun 2011, iya lalu mindah ngagai ‘stall’ kedai makai enda jauh ari Giant Hypermarket, Tabuan Jaya laban palan endur iya keterubah nya diketuka kena ngaga siti palan endur raun.

Udah nya, iya lalu muka dagang tu ba Rumah Pansuh Tabuan Dayak bisi setaun sebedau pindah muka ‘Mummy Patz Dayak Cafe’ ba Uni Central, Kota Samarahan ba taun tu.

“Taja udah lama bejual pemakai Dayak maya nya, bisi sekeda bala kaban meransang aku muka kedai makai kediri tang ati aku agi kakang laban apin berani nangi enda tetangkup sereta nadai penemu dalam dunya dagang.

Pama goreng kichap

“Perambu ngaga kedai makai kediri tu sigi udah lama ba ati aku tang mayuh pekara agi dikenangi ngasuh perambu tu tejanggal belama.

Berekat sukung ari mensia mayuh

“Tang ba taun 2019 aku nyakap diri empu nguji muka ‘Mummy Patz Dayak Cafe’ tu. Enda disangka berekat sukung ari mensia mayuh cukup manah sampai ke sida datai ari palan ti jauh nuju kedai makai aku kitu” ku Patz Mering ti seruran tuchum nyaut tanya ari pengari Suara Sarawak.

Kenu ku iya taja suah udah mindah kin kia tang mensia mayuh tetap nitih penunga kuing iya ti bejual pemakai Dayak tu enda ngetu lalu majak mayuh semayuh. “Mensia mayuh datai makai kitu tu enda ngetu nya meh ti ngasuh aku majak meransang diri ngetan ke dagang tu. Taja kedai makai aku tu baru dibuka apin lama serta jauh ari tengah pasar tang mensia ke datai makai kitu enda nemu leju” ku iya.

Kelimpah ari nya, Iya madah pengelurus ati lebuh bedagang tu meseti dikembuan semua orang laban nya kunchi pemujur dagang iya nyentuk ke diatu.

Kulat gulai paku ikan

“Lapan taun aku bebendar enggau lurus ati nyual pemakai Dayak tu awak ke temuai ti makai ba kedai aku puas ati lalu seruran datai ninting ari.

“Sekumbang nya mega aku cukup beterima kasih ke sukung mensia mayuh ti datai makai lauk ke disumai aku laban sida tu ti ngangkat ke nama aku dikelala orang bukai sentang pemakai Dayak” ku iya sinu seraya ngendas ai mata ti enda berasai labuh nitik.

Juluk ati nyadi pengeluar pemakai Dayak

Nagit diri empu nyadi pengeluar pemakai Dayak ti dikelala mayuh orang awak ke pemakai bansa Dayak nyadi siti ari pemakai ti setipak baka pemakai bansa bukai, iya ngarap ka juluk ati tu ulih dijapai jemah.

Pia mega iya nagit diri ulih mantu bansa diri ti bejual sayur kampung baka miding, paku, daun empasa enggau ke bukai ti suah dipeda kitai ba pasar tamu.

Udah nya, iya meransang nembiak rebak baru ngambi anang takut nguji taja nadai pengelandik ba mayuh macam dagang enda ngira dagang pemakai tauka dagang bukai.

Tekuyung rau

“Peransang aku ngagai nembiak rebak baru kelebih agik bansa Iban anang takut nguji enggau orang bansa bukai sama berindik ba dunya dagang.

“Ati meseti lurus sereta anang beambi ulih ba orang bukai ngambi ka dagang kitai tetap seruran dikerindu orang laban nya ti dikembuan aku nyentuk ke diatu” ku iya nutup randau.

Sapa ti deka nguji makai ba ‘Mummy Patz Dayak Cafe’ tu tau datai ninting Hari Satu ngagai Hari Enam. Dibuka berengkah pukul 8.30 pagi nyentuk ke 10.30 malam.

Kita mega tau ngelawa media rama iya ba ‘facebook’ enggau ‘instagram’ ngena nama ‘Mummy Patz Dayak Cafe’.

BIODATA

Taukey Mummy Patz Dayak Cafe
Nama : Patterilla Anak Augustine
Nama Timang : Patz Mering
Umur : 52 taun
Asal : Betong
Berengkah Bedagang Pemakai : 2011
Palan Kala Endur Bejual : King Centre, Tabuan Jaya enggau Uni Central, Kota Samarahan (diatu)
Chara Ngelaku Pemakai : Media Rama Facebook enggau Instagram

Perut jani gulai sayur

 

Undang enggau ikan goreng

 

Ikan keli pansuh gulai daun bungkang

 

Tubu asam gulai daun sabung

Suara Sarawak