KUCHING: Muzium Pesaka Industri Penyangkai Kapal Brooke ulih dilawa mensia mayuh belabuh sehari tu pengudah dipenyadi Premier Sarawak, Datuk Patinggi Tan Sri Abang Johari Tun Openg malam tadi.

Menteri Dagang Temuai, Industri Kreatif enggau Seni Pemerindang Sarawak, Datuk Seri Abdul Karim Rahman Hamzah madah, muzium ti ulih dilawa nya deka nyadi pematak baru ba mengeri tu lalu nyungkak sektor dagang temuai bepelasarka pesaka asal enggau sejarah.

“Brooke Dockyard Industrial Heritage Museum (Muzium Pesaka Asal Industri Penyangkai Kapal Brooke) tauka sebedau tu disebut Brooke Dockyard nya penyangkai kapal keterubah dikemansang ba Borneo enggau Malaysia kenyau ari taun 1912 ba jeman Charles Brooke.

“Keterubah suba, palan tu nyendia servis ungkup kapal raja sebedau ngerembai ngagai pengawa miki kapal, sukung minyak enggau gas sereta latih injiniring ngujungka nya nyadi palan gawa industri keterubah,” ku iya.

Karim nyebut jaku nya pengudah ngatur penemuai basa ngagai Premier Sarawak di Komplek Satria Pertiwi, ditu kemari ngambi ngangau ke iya bejadi muzium nya sereta bekunsi penerang bekaul atur pengawa sereta penerang pemadu baru bekaul Opis Muzium Sarawak.

Menteri Nembiak, Lumba enggau Pemansang Orang Dagang Sarawak nya mega madah, muzium nya mandangka mayuh galeri nyengkaum mesin asal penyangkai kapal sereta pemandang bekaul evolusyen industri.

Ku iya baru, naka diatu tama ngagai muzium nya nadai bebayar lalu muzium nya mega deka ngenap pematak ti bisi diatu baka Muzium Budaya Borneo enggau Kampung Budaya Sarawak.

Bela datai, Direktor Opis Muzium Sarawak, Nancy Jolhi sereta Sapit Direktor Opis Muzium Sarawak, Yasmin Khalid Nicholls. — EDISI UKAS