BINTULU: Nadai varian igi penyakit COVID-19 ti baru ditemu ba menua tu lalu pengerekai igi penyakit nya agi ulih dijaga laban tebal agi kes ti diripot semina ngembuan kelai enda raya sereta enda ibuh diperubat ba sepital.
Menteri Pengerai Malaysia, Datuk Seri Dr Dzulkefly Ahmad ba sebengkah penerang sehari tu madah, varian COVID-19 ti benung ngerekai ba Malaysia endang varian Omicron sereta mungkur subvarian XBB.1.16, XBB.1.5, EG.5 enggau JN.1.
Iya madah, subvarian Omicron ti benung ngerekai nya enda mai ngagai kes raya.
“Igi penyakit COVID-19 deka idup begulai enggau kitai baka igi penyakit ti nyerang jalai seput ti bukai baka influenza.
“Mensia mayuh dilalau seruran ngemerat gaya idup sebela ari sukut pengerai enggau pengidup rambau kes tu ti benung ngerekai,” ku iya.
Dr Dzulkefly madah, ungkup Minggu Epidemiologi ke-51 iya nya berengkah ari 17 nyentuk 23 Disember tu tadi, tikas pesakit COVID-19 ti dipasuk ba sepital semina 0.5 peratus aja lalu tikas pemarai semina 0.08 peratus.
“Tu mai reti tikas kededua parameter nya agi ba tikas baruh,” ku iya.
Iya madah, KKM deka terus matau gaya COVID-19 enggau varian bekaul sebarang maya.
Ku iya, raban orang tuai, sida ti sakit raya enggau sida ti ngembuan tikas imuniti ti baruh diperansang ngena sengkabung mua lebuh ba palan ti sekut tauka ngena perengka pengangkut mensia mayuh.
