KAPIT: Pengawa ngaga jematan ba sekeda endur ti strategik di Bagi Menua Kapit meseti dikemerat dikena ngemanahka rentayan komunikasyen sereta ngambi peranak menua tu enda kelalu bepanggai ba servis feri.
Menteri Kereja Raya ti mega Kaban Parlimen Kapit, Datuk Sri Alexander Nanta Linggi madah, perengkaguna komunikasyen sungai ti agi nyadi jalai penyambung pemadu beguna ngagai sekeda kandang menua meseti terus diberi perati ari perintah.
“Sarawak berasai temegah ati enggau pemujur nembuka 21 jematan besai ti beungkus RM6.92 bilion ngena agih belanja perintah nengeri baka Jematan Batang Lupar pemanjai 4.8 kilometer (km) ti nyadi jematan pemadu besai meraka sungai di Malaysia.
“Nya alai, aku ngarapka pengawa ngaga jematan penyambung baka nya ulih dikerembai ngagai Bagi Menua Kapit, kelebih agi ba endur ti strategik baka Nanga Baleh, Nanga Merit, Nanga Jak enggau Ulu Katibas,” ku iya.
Nanta bejaku munyi nya rambau Program Sarawakku Sayang di Kapit ditu kemari.Ku iya, di Nanga Merit taja pan bisi disediaka servis feri, tang pengawa ngaga jematan beguna dikena nyambung kandang menua seberai enggau Baleh laban udah bisi dua buah servis feri ke ili iya nya ba Nanga Menuan / Nanga Tulie enggau Nanga Melipis.
Ngenang pekara bukai, iya meri puji ngagai mayuh macham inisiatif pemansang menua pesisir ti udah sereta benung dipejalaika di Bagi Menua Kapit nengah Ejensi Pemansang Kandang Menua Ulu Rajang (URDA).
Taja pia ku iya, bisi sekeda pengawa ngaga jalai ti udah tembu agi bedau ulih dikena penuh laban bedau disambung enggau rentayan jalai batang, kelebih agi ba kandang menua Pelagus enggau Merit.
Ku Nanta, gaya tu ngujungka sekeda peranak agi betapi enggau pemar ari sukut akses perengka pengangkut taja pan jalai alun nyau semak enggau kandang endur pengentap pendiau sida.
Iya madah, projek jalai alun ari Jiwa Murni ke Baleh enggau Merit sepemanjai 60 km enggau ari Merit ke Melangkah sepemanjai 130 km udah tembu digaga lalu dikearapka ulih muka mayuh agi peluang sosio-ekonomi ngagai peranak, nyengkaum dalam sektor agro-komoditi.
“Nya alai, aku ngarapka Premier (Datuk Patinggi Tan Sri Abang Johari Tun Openg) meratika rentayan Jalai Jiwa Murni di Bagi Menua Kapit terus diberi perati dalam perambu pemansang jemah ila ngambika pemaik infrastruktur ulih diasaika penuh rayat.
“Pemansang fizikal meseti disebelaka enggau pemansang modal mensia nengah pelajar, latih pengelandik enggau pengawa nyendiaka mayuh agi peluang ekonomi.
“Aku mantaika pengarap ati di baruh iring Premier sereta sukung perintah nengeri enggau rayat ngambika Bagi Menua Kapit deka terus mansang nyadi pelilih menua ti progresif, kompetitif sereta nyadi siti ari pengerembai besai pemansang Sarawak,” ku iya.
