BINTULU: Bisi 13 tuai ruang bilik (KIR) ti dituntung penusah biau balai ba Kampung Pandan, Sebauh ditu nerima bantu ari Kaban Parlimen Bintulu, Datuk Seri Tiong King Sing.
Genap KIR nerima bantu mata duit sepenyampau RM1,000 siku ti disuaka Pegawai Khas Kaban Parlimen nya, Steven Kong Kai Seng enggau Azman Abdul Rahman.
Berebak enggau nya, Steven ngarap bantu nya ulih mantu ngelempung tating belanja raban nya ti dituntung biau balai lemai Hari Tiga tu tadi.
Penusah ti nyadi nya ngujungka begunan opis Sekula Primari (SK) Pandan enggau tujuh bilik kelas ungkup kelas Primari Satu nyentuk Enam enggau prasekula rusak.
Naka diatu, semua nembiak sekula nya bejalaika pengawa ngajar enggau belajar ari rumah (PdPR) pengelama dua hari (29 nyentuk 30 April) lalu deka belajar baka selama ba sekula berengkah ari Hari Tiga tu.
Pia mega, pengajar enggau staf sekula nya diengkah ba baruh bilik makmal lalu sesyen ngajar enggau belajar ungkup dua kelas diatur sementara ba bilik makmal lalu dua kelas ti bukai ba buding.
Nambahka nya, dua kelas agi ba librari enggau sebuah kelas ba balai makai.
