DUNYA pemerindang Dayak kemaya hari tu ukai semina dirichahka sida ti datai ari ruang bilik seni aja tang mega sida ti ngembuan pengawa profesional ti enchabar.
Siti nama ti majak dikelala enggau enchuri ati bala peninga muzik Iban iya nya Nathalia Dendan tauka rindu agi dikangau Natalia D.
Narit ati agi, iya ukai semina ngembuan sera nyawa ti chukup lunak didinga aja tang iya transformasyen ari siku indu misi ti gawa ba sepital ngagai siku penanyi ti regas merindang ba atas panggau.
Ba umur iya 24 taun, Natalia D endang dipatih ngena disiplin ti tinggi.
Pangku pengawa nyadi indu misi begunaka pengeliat ati, selalu meri perati sereta pengetan runding enggau emosyen ti besai.
Taja pia, ba belakang uniform burak ti dirasuk enggau pangku pengawa nyaga pengerai pesakit ti disayau, iya ngembuan penau seni ti besai.
PENGERINDU BELAGU
Dara asal Kampung Gawang, Simunjan nya anak pengkuan ari lima iku diri menyadi.
Iya ngaku, benih pengerindu ba pengawa belagu udah matuk lalu nyumbuk kenyau iya beumur 10 taun.
“Aku rindu ke pengawa belagu tu kenyau ari mit nyentuk sehari tu.
“Laban chukup rindu ke pengawa tu, nya kebuah aku suah masuk mayuh pekit belagu ti diatur raban sekula kenyau ari taun 2010,” ku Natalia D.
Pejalai profesional iya ba pengawa merindang bepun ba taun 2024 pengudah bulih penuduk ketiga ba Pekit Belagu BKMP-7 ti diatur Kaban Music Production (KMP) di Kuching.
Penyulut ba pekit nya mujur nukang pintu ngagai iya nyingkang ke dunya pemerindang sereta ngeluarka single keterubah ti bejuluk Sulu Ngelebu.
RANCHAK TUWIS
Enti single keterubah mandang sukut ayun lundai enggau balada, single kedua Natalia D ti bejuluk Beambai Anak Temuai chukup enchabar versatiliti iya nyadi siku artis.
Lagu betiun ranchak tuwis ti mujur dikeluarka kena 29 March tu tadi siti genre ti begunaka pengeregas, pengeransing enggau ekspresyen ti lantang.
Natalia D madah, lagu nya ngenang pengaga ati siku bujang sigat ti tetemu ke siku dara bajik ba siti pengerami ba rumah panjai.
“Tu meh keterubah aku ngeluarka lagu betiun ranchak tuwis.
“Aku berasai gaga enggau temegah ngagai diri empu laban ulih nguji pekara ti bebida.
“Lebuh bisi awak lepa pengudah letih gawa, aku belatih vokal kediri empu ba rumah ngambi ulih meri pemadu manah ngagai bala peninga,” ku iya enggau penuh pengagit.
Penyelai elemen muzik asil keranjai jari komposer bepenau, Ijal Zainal mujur nempa lagu nya nyadi siti asil seni ti narit ati.
Nya meh ti ngasuh lagu Beambai Anak Temuai chukup engkeman ditebah ba sebarang program enggau pengerami baka Gawai Dayak.
PUN PERANSANG
Lebuh ditanya sapa ikon ti nyadi peransang iya ba pengawa belagu, Natalia D enda merening jauh ngagai endur bukai.
Iya milih artis lokal ti tebilang enggau mayuh penau iya nya Melissa Francis nyadi peransang iya.
“Melissa Francis siku orang ti besai juluk enggau enda mudah nyerah alah.
“Aku meda baka ni iya mujur beutan nyentuk sehari tu ba industri ti chukup enchabar tu lalu nya nyadi sempama peransang aku.
“Nya alai, aku deka nunda singkang iya lalu enda malik ke belakang agi,” ku indu misi nya.
SEMAMPAI ENSURUK
Ba Natalia D, penguji besai ditapi iya ba dunya pemerindang iya nya lebuh bekunsi panggau enggau bala artis senior ti udah lama nempa nama ba industri tu.
Seraya ngemaruhka diri, iya madah, lebuh bekunsi panggau enggau sida, iya ngasai kediri empu chukup mit.
“Sapa meh aku enti dibanding enggau sida.
“Aku agi baru bendar ba industri tu enda nyala baka anak mit ti agi belajar bejalai tang sida udah deras belanda.
“Nya meh ti ngasuh aku asai ti mit lebuh bekunsi panggau enggau sida.
“Taja pia, sida chukup mereti pengasai ati aku lalu enda neju aku bejalai kediri.
“Sida mega seruran ngembing, ngajar enggau meri peransang ngagai aku ngambi terus nyingkang ke mua,” ku iya.
Pekara nya enda madamka pengarap Natalia D tang meri peluang ngagai iya belajar pasal etika atas panggau sereta chara bekomunikasyen enggau mensia mayuh.
Kenang manis ba sepanjai pejalai seni iya lebuh diberi peluang merindang ba menua ulu.
“Meda mua mensia mayuh datai meri sukung sereta bepeluang begambar enggau sida, nya siti pengelantang ti enda ulih dibeli ngena duit ringgit.
“Nya kebuah aku chukup ngaku enggau manah masa sukung diberi sida,” tampung iya baru.
PINTAR MAGI AWAK
Nyadi indu misi ti gawa ba wad sepital sereta begelar artis ukai pekara ti mudah ba dara bajik ti rindu makai Laksa Sarawak nya.
Taja pia, pemintar Natalia D ngatur awak diri enggau manah sereta disiplin ti tinggi mujur mantu iya nyemela kededua dunya nya.
Iya suah ngena awak lepa ungkup belajar vokal dikena ngansah penau diri belagu.
Lebuh ditanya pasal tunga kuing industri muzik Dayak, Natalia D andal industri tu majak maju sereta dikerindu ke semua orang enda ngira bansa.
Nya alai, iya ngarap bala artis enggau pemekuh industri muzik Dayak terus ngeluarka lagu bekualiti enggau bemacham tiun ngambi ulih rembus makit ti besai agi dudi hari.
Natalia D ngeleda ba tetiap penyulut anak seni bisi sukung tegut ari mensia mayuh.
Berebak enggau nya, iya meri besai terima kasih ngagai semua orang ti nyukung pejalai seni iya ari pun nyentuk sehari tu.
“Terima kasih ngagai kami sebilik, bala bakih, kaban belayan kelebih agi bala peninga ti semampai nyukung aku ngelama tu.
“Enti nadai kita semua, Natalia D ukai sapa-sapa. Sukung kita nyadi peransang aku terus ngasilka lagu ti bekualiti dudi hari,” ku iya nutup randau.
Natalia D nyadi bukti nyata pengawa profesional enggau pengerindu seni ulih bejalai seretai.
Nengah pakej dikembuan iya nya disiplin nyadi siku indu misi enggau penau nyadi siku artis, diatu iya nyadi aset beguna ba industri muzik Sarawak.
Ngagai kita ti bedau ninga lagu Beambai Anak Temuai, kita diperansang ningaka lagu tu nengah YouTube tauka pelasar bukai, dia dih kaki kita enda berasai kekebak.
