KUCHING: Pengawa negi pemaik Malaysia, nanggam kaul dagang enggau pengawa meranak puku enggau Austria sereta Slovakia, nyengkaum nambah peluang kerejasama ti meri pemaik ngagai Sarawak deka nyadi pekara diperati Datuk Fenny Nuli pengudah dichiri nyadi Duta Besai Malaysia ke Republik Austria.

Ku iya, kedutaan Malaysia di Vienna sedia nyukung sebarang inisiatif Perintah Sarawak dikena ngerembai kerejasama enggau kededua menua Eropah nya ba bidang ti bisi pemaik begulai.

“Nyadi Duta Besar Malaysia, aku nganti peluang negika pemaik Malaysia lalu deka ngelaku dagang enggau pengawa meranak puku entara Malaysia enggau Austria sereta Malaysia enggau Slovakia. 

“Sebarang nengeri ti begunaka bantu Kedutaan Malaysia di Vienna dikena ngelaku kerejasama enggau kededua menua tu deka bulih sukung kami,” ku iya ba aum pemberita pengudah ngatur penemuai belidar gawa ngagai Premier Sarawak, Datuk Patinggi Tan Sri Abang Johari Tun Openg di Kompleks Satria Pertiwi, ditu ensanus.

Ku iya agi, ba penemuai nya, iya mega berandauka pengulih kerejasama ti ngaul pemaik Sarawak di Austria enggau Slovakia ba randau nya.

Ku iya, Austria bisi pengelebih ba bidang hidrogen gadung, ngatur ai enggau bemacham teknologi maju seraya Slovakia tebilang enggau sektor teknologi automotif.

“Tu mega entara bidang ti ulih diserungkai Malaysia begulai enggau kededua menua nya lalu pekara nya mega dikerandau aku enggau Premier sehari tu (1 Julai),” terang iya.

Nambah ke nya, iya mega minta penemu enggau sanding penemu Abang Johari bekaul isu besai ngagai Sarawak enggau Malaysia dikena nyaup iya ngesan tanggungpengawa diplomatik.

Berebak enggau nya, Fenny mega meri terima kasih ngagai Perintah Sarawak kelebih agi Premier ke sukung ti diberi ngagai Opis Wilayah Sarawak, Opis Menteri Luar Nengeri sepanjai timpuh dua taun iya gawa nyadi direktor opis nya.

“Aku deka meri terima kasih ngagai Perintah Sarawak kelebih agi Premier ke semua kerejasama ti diberi ngagai Wisma Putra enggau opis aku sepanjai dua taun ti udah,” terang iya.

Fenny dichiri nyadi Duta Besai Malaysia ke Republik Austria enggau akreditasyen seretai ke Republik Slovakia, kelimpah mega dichiri nyadi Pengari Mendam Malaysia ke Serakup Bansa Beserakup (PBB) enggau organisasyen antarabansa bukai ti bepalan di Vienna.

Nyadi siku diplomat ngembuan peneleba manggai 30 taun, iya ngulu Opis Menteri Luar Nengeri ba taun 1997 enggau kala gawa di Geneva, Poland, Thailand, Belgium, Peru enggau Austria, kelimpah mangku sekeda pangku pengawa kanan di opis menteri nya.

Iya mega kala gawa nyadi Duta Besai Malaysia ke Peru ari 2019 nyentuk 2023 enggau akreditasyen seretai ke Bolivia, Colombia enggau Panama sebedau dichiri nyadi Direktor Opis Wilayah Sarawak, Opis Menteri Luar Nengeri.

Fenny ngembuan Degree Sastera (Kepujian) dalam Sains Kemasyarakatan ari Universiti Sains Malaysia (USM) sereta Diploma Pentadbiran Awam ari Institut Tadbiran Awam Negara (INTAN).

Kelai ngaku pemesai jasa ba servis perintah, iya diberi Pingat Pegawai Bintang Sarawak (PBS) pada 2017 enggau Panglima Setia Bintang Sarawak (PSBS) pada 2025. – JACINTHA JOLENE