KUCHING: Raban nembiak Belaga diperansang nampung pelajar sida ba bidang Pelajar enggau Latih Teknikal enggau Vokasional (TVET) ti bisi disedia Politeknik Kuching Sarawak (PKS).
Ketuai Opis Pekara Nembiak Politeknik Kuching Sarawak Mahathir Mohamad Kamin, PKS nerima penatai 120 iku nemnbiak lepas SPM enggau STPM ari Pelilih Belaga beserimbai enggau Program Jom Ke Institusi Pengajian Tinggi (IPT) 2019.
“Sida diberi penerang sentang peluang nampung pelajar ba tikas Diploma di Politeknik Malaysia kelebih agi di PKS, atur leman enggau nganjung peminta nengah online.
“Sida mega dibai ngabas program PetroCHAMPS ti benung dipejalai bala nembiak Diploma Kejuruteraan (Proses) Petrokimia meda projek kepenudi nembiak semester 5 sebedau nyereta Latih Industri maya semester 6,” ku iya.
Pejalai sida mega disempulang ADUN Murum Kennedy Chukpai Ugon, ti mega meransang raban nembiak Belaga nampung pelajar ba bidang TVET.
Program tu kerejasama kelima ti mujur dipejalai entara ADUN enggau Tabung Amanah Bakun (TAB), Kelab Belia Belaga Sarawak (KBBS) enggau Sarawak Energy Berhad (SEB).
Ku Mahathir nambah, program tu nerima sukung tegap ari Menteri Muda Bekal Ai Sarawak ti mega ADUN Belaga Datuk Liwan Lagang, MP Hulu Rajang Datuk Wilson Ugak Kumbong.
“Sapit Direktor Pemantu Akademik Mohamad Khirudin Amdan mega temegah ati meda kerejasama semua raban ti ngelanggur enggau bejalaika program pelajar baka tu setipak enggau juluk perintah ngangkatka bidang TVET ditu.
“Iya mega bisi ngingatka semua nembiak jampat nganjung peminta sida nengah UPU Online sebedau hari bulan kepenudi kena 2 April 2019,” ku iya.
Sama datai Pemesai Eksekutif TAB Romio Ding, pengari SEB enggau Komiti Nembiak Belaga.
