LONDON: Sekeda apai indai mejah atur baru ba sebuah sekula ditu ti netapka nembiak lelaki ngena skirt tang nagang ngena tanchut pandak nyerumba musin angat.

Tebal agi bala apai indai ngelalau raban sekula Akademi Tinggi Wymondham ba Norfolk mantaika uniform khas ungkup nembiak dikena napi musin angat.

Sida madah, pengawa ngasuh nembiak lelaki ngena skirt nya sebengkah pengawa beli enggau beduan nembiak taja pen raban sekula madah uniform nya ulih dikena enda ngira penempa.

“Semua nembiak lelaki enggau indu diberi peluang milih uniform sekula sekali ke nya ngena skirt bechura kelabu tauka tanchut panjai sekula bechura kelabu.

“Ungkup penerang, pengawa netap uniform sekula ti ulih dikena enda ngira penempa tu kebendar nadai bechiping entara nembiak lelaki enggau nembiak indu,” ku prinsipal sekula nya, Jonathan Rickey.

Taja pia, tebal agi bala apai indai enda setuju enggau atur baru sekula nya laban skirt semina engkeman dikena nembiak indu aja.