Nembiak lemas ba Sg Ngemah udah temu

KANOWIT: Siku nembiak lelaki ti lenyau dipelaba lemas lebuh mandi ba Sungai Ngemah di Skim Pengentap Baru Nanga Jagau kena Hari Empat tu tadi , udah temu pagi tadi.

Niang Nekson Dana Raimond beumur tujuh taun ditemu sida serumah urung pukul 8.45 pagi tu tadi.

Ku Ketuai Balai Bomba enggau Penyah Penusah Pelilih Kanowit, Arrahman Chik ba sebengkah penerang madah, bangkai nembiak nya ditemu melepung ba tebing Sungai Ngenmah di Nanga Benung urung 3 kilometer penyauh ari ili endur penusah nyadi.

Iya madah, peranak ba genturung pendiau nya lalu madah ngagai piak bomba pengudah sida tetemuka bangkai nembiak nya.