Nembiak menyana nempa pemujur menua

KUCHING: Gaya ulah nembiak kemaya hari nyadika cheremin ngagai gaya pemujur menua jemah, ku Menteri Dagang Temuai, Seni, Main Asal, Nembiak enggau Lumba, Datuk Abdul Karim Rahman Hamzah.

Kenu ku iya, pemujur enggau pemuntan menua ngemudika agenda pemansang bepanggai ba kualiti nembiak ti ditempa.

Iya mansutka jaku nya lebuh nyimpul mosyen Opis Menteri Dagang Temuai, Seni, Main Asal, Nembiak enggau Lumba rambau Aum Dun hari keenam kemari.

Nya kebuah Opis Menteri seruran chakah ngenegapka pemansang nembiak di Sarawak nengah mayuh bengkah program nyengkaum ngatur program Pejalai Nembiak Sarawak.

“Program tu deka meransang nembiak ngaul diri enggau komuniti menua nya begulai enggau mayuh bengkah ejensi, serakup enggau gempung ukai dikuasa perintah (NGO) mungkur 40 kandang menua selampur Sarawak nyentuk taun 2020.

Datuk Abdul Karim Rahman Hamzah

“Nengah program tu, bala nembiak ulih bekunsika penerang pasal agenda enggau polisi tansformasyen perintah sereta peluang ngena manah pengelandik enggau penau soda empu kelimpah nerenak semengat nyadi ketuai entara sida,” ku iya madah nyemetak.

Pia mega ku Abdul Karim, program tu nyendiaka pelasar ngagai bala nembiak mantaika penemu enggau bekunsika penerang begulai enggau bala ketuai nengah randau Town Hall nyengkaum pengawa dagang, lumba enggau rekreasyen sereta pengawa mandang enggau pemerindang.

Penyampau tubuh nembiak di Sarawak diatu 43.54 peratus ari 2.8 juta peranak seraya Survey Indeks Nembiak Sarawak ti berengkah dipejalai dalam bulan Ogos 2018 disadang tembu Mei tu, ku iya.

Penerang tu deka nyadika lalau dikena ngelanggur pemansang enggau polisi pengidup dudi hari bala nembiak di menua tu.

Ba lansa bekaul enggau Komiti Pemansang Nembiak Sarawak kena 19 September taun nyin tadi ulih matau penanggul enggau isu bekaul pemansang raban nembiak di Sarawak begulai enggau ejensi perintah enggau NGO.

Suara Sarawak