MUKAH: Siku nembiak mit lelaki ti diripot lenyau Hari Dua tu tadi mujur ditemu dalam kampung lebih 50 meter penyauh ari Rumah Lang, Nanga Meruan Dijih, Selangau ditu, pagi tadi.
Tuai Polis Pelilih Mukah, Deputi Superintendan Muhammad Rizal Alias madah, nembiak mit beumur 12 taun nya ditemu raban bomba ti bejalaika operasyen ngiga enggau nyelamat (OP SAR) pukul 9.55 pagi.
Iya madah, pengudah ditemu, nembiak mit nya dibai ngagai Klinik Pengerai Selangau ungkup diperubat enggau atur bukai.
“Berebak enggau pengawa tetemu ke nembiak mit nya, OP SAR diketu pukul 10.30 pagi,” ku iya ba sebengkah penerang tadi.
Nangkan nya, iya meri terima kasih ngagai semua raban bekaul ti bela mantu ba pengawa ngiga orang lenyau (OH) nya.
Dulu ari nya, Indu Opis Polis Pelilih (Mukah) minta saup enggau kerejasama mensia mayuh ngiga siku nembiak mit lelaki ti diripot lenyau.
