Nembiak patut nemu seling politik

KUCHING: Nembiak manggai umur 18 taun kelebih agi ba kandang menua pesisir bedau entu sedarka seling politik nyadi pengundi.

Kaban Parlimen Mas Gading Mordi Bimol madah, bala nembiak beumur 18 taun bedau entu sedia enggau sedarka seling politik kelebih agi sida ke diau ba menua pesisir.

“Pekara tu dikenangika aku laban sida baru rejista nyadi pengundi kelebih agi ti baru manggai 18 taun ari kandang menua nya.

“Kebuah pia laban sida bedau entu nemu seling politik dibandang nembiak diau di mengeri,” ku iya.

Iya mansutka jaku nya beserimbai enggau Pekit Pidato Kenegaraan 2019 Renggat Nengeri Sarawak, tadi.

Pia mega ku iya, Pengawa Bepilih Besai (PRU) meri peluang ngagai sida ti beumur 18 taun milih ketuai ti patut ti deka nentuka kuing pemansang menua.

“Ari peneleba aku empu lapan taun ke udah, tebal agi sida ke diau di menua semina meretika pengawa bepilih tu iya nya Barisan Nasional lalu BN tu dikumbai pengawa bepilih.

“Sida enda nemu diri empu ulih ngundi parti bukai laban undi nya resia,” ku iya nampung.

Ku Mordi, iya enda ngenggaika rayat ngundi enggau milih sebarang parti ti dikedeka sida, tang pekara beguna amat iya nya pun politik enggau reti pengawa bepilih patut ditemu rayat menua pesisir.

Mordi Bimol

Suara Sarawak