TUAI Apun Sekulah dalam jaku Penan tauka disebut Aram Nurun Ke Sekula nya Program Khas (PROKHAS) ti diatur Opis Pelajar Nengeri Sarawak (JPNS) dikena negap pengawa nentuka akses pelajar inklusif ngagai komuniti menua ulu.
Bisi dua genturung ngemujur PROKHAS Tuai Apun Sekulah tu iya nya ba Kampung Long Peran enggau Kampung Long Jaik. Program ti belabuh diatur kena 12 Januari 2026 nya meri perati ngagai empat batang pekara dikena mantu nembiak.
Empat batang pekara tu nyengkaum nyelinting nembiak Penan ti kena tinggal enggau enda kala besekula enggau ngemerat pengawa nguasa 3M iya nya Macha, Nulis enggau Ngitung.
Pia mega, dua da batang pekara iya nya berundingka pemansang sosial sereta pengelandik tumu nengah inisiatif ti meri pengelantang ngagai komuniti lalu seraris enggau budaya lokal.
Direktor Pelajar Sarawak, Omar Mahli madah, PROKHAS Tuai Apun Sekulah diatur ngena konsep mobile classroom nentuka pelajar dibai terus ke rumah panjai ba Long Jaik enggau Long Peran.
“Chara nyeridi enggau bemain dikena matak minat nembiak enggau nempa gaya belajar ti lantang, nemban enggau ngerindu ati,” ku iya.
Ku iya, PROKHAS nya asil randau begulai enggau komuniti Penan ti diatur taun nyin tadi ba kededua genturung pendiau nya.
Randau nya mega digulu Direktor Unit Pengatur Sekula, Opis Menteri Pelajar Malaysia (KPM) lebuh nya, Datuk Amzan Malek (diatu nyadi Sapit Tuai Direktor Pelajar Malaysia Sektor Pemansang Profesionalisme KPM).
Direktor Unit Pelajar enggau Latih Teknikal Vokasional, KPM Zulkernai Fauzi, Sapit Dorektor Sektor Pengatur Sekula JPNS, Dr Les Met, pegawai JPNS sereta pegawai Opis Pelajar Pelilih (PPD) Belaga.
Ku iya, randau nya mega tetemu ke mayuh nembiak mit ba Long Peran enggau Long Jaik apin enggau enda kala besekula.
Ngenang silik, Omar madah ke kebuah pekara tu nyadi ketegal penanggul pengangkut enggau takah sekula ti kelalu jauh ari genturung pendiau lalu sekula pemadu semak iya nya Sekula Primari (SK) Batu Keling enggau SK Long Urun.
“SK Batu Keling tu penyauh urung 61 kilometer (km) ari kededua genturung pendiau nya lalu takah pejalai urung dua jam. “Seraya, SK Long Urun penyauh 67km enggau timpuh pejalai tiga jam.
“Penyauh enggau takah pejalai tu meri penanggul ari sukut akses pelajar ngagai bala nembiak lalu apai indai mega napi pemar beranjungka anak nurun sekula,” ku iya nyemetak.
Nya kebuah, ku iya, PROKHAS Tuai Apun Sekulah udah matak 151 nembiak ngambi bagi ba program nya nyengkaum 65 ari Kampung Long Peran enggau 86 ari Kampung Long Jaik ti beumur entara lima nyentuk 17 taun.
Nambah ke nya, ku iya, timbal apai indai enggau komuniti bekaul PROKHAS nya mega chukup manah seraya nyeremin pengeleda ngagai pemesai guna pelajar ba komuniti menua ulu.
Nangkan nya, Omar madah ke PROKHAS dilanggur seraris enggau timpuh Pelin Pemansang Pelajar Malaysia (PPPM) 2026– 2030, tang timpuh nya bepanggai ngagai tikas nembiak ti kena tinggal ba menua ulu.
Nerang silik, iya madah ke ba renggat nasional, KPM udah merambu inisiatif PROKHAS nyadi model intervensyen pelajar enggau program baka nya diatu nyadi Tikas Penyulut (KPI) Menteri Pelajar Malaysia, Fadhlina Sidek mutar isu akses pelajar ba menua ulu selampur menua.
Nya alai, Omar nyemetak madah ke pejalai PROKHAS nya bukti inisiatif meruan perintah nentuka nadai nembiak kena tinggal ari sistem pelajar, seraris enggau juluk Pelajar Ungkup Semua, Nadai Adan.
Ba pekara sebaka, Penulung Direktor Unit Perambu Ekonomi Sarawak, Benard anak Upieh ti bela datai nyukung atur program nya madah ke Program Misyen Akses Pelajar Nembiak Penan ba dua genturung pendiau nya siti inisiatif ti engkeman sereta nemban ngambi mereti ke utai ti amat nyadi ari sukut pelajar.
“KPM enggau Perintah Sarawak naka ulih bejalaika pengawa ti patut lalu apai indai enggau nembiak mega meseti meri kerejasama nentuka inisiatif tu mujur.
“PROKHAS tu endang program ti chukup manah enggau nemban ungkup nembiak menua ulu nentuka sida bulih penguntung ari akses pelajar nya.
“Enti nitih, ba taun 2025 tauka 2026, isu baka tu enda patut nyadi tang tu mih realiti. Kitai enda ulih ngenggai lalu nya kebuah kitai mega naka ulih mutar isu tu.
“Siti ari chara nya nengah akses pelajar laban aku mega datai ari menua ulu lalu aku chukup pechaya ke pelajar ulih ngubah pendiau pengidup kitai.
“Ari pelajar mega kitai ulih nempa pengidup ti menyana ukai semina ungkup diri empu tang mega ungkup diri sebilik enggau komuniti ngelingi nya.
“Nya kebuah, PROKHAS tu ulih marit nembiak ba menua ulu ngembuan pengerindu sereta angkun belajar ngambi ngubah pengidup.
“Ukai naka nya aja, leka jaku Tuai Apun Sekulah mega dikena ngambi nembiak regas enggau bagas nurun ke sekula.
“Program baka tu mega patut ditampung ngambi mayuh agi nembiak bulih pemaik nengah akses pelajar ti inklusif, menyana enggau meruan agi,” ku iya ngeraup.
