MATU: Urung 312 iku nembiak ke beumur 16 enggau 17 taun udah mujur betuchuk vaksin dos keterubah ba PPV Dewan Serbaguna Matu ensana.
Ari penyampau nya, 255 iku nembiak ari SMK Matu enggau ke bukai 57 iku ari ari sekula luar Matu.
Nangkan ke nya, di Klinik Pengerai Igan, bisi 84 iku nembiak udah nerima tuchuk vaksin keterubah sida.
Bepelasarka perati tebal agi bala nembiak chukup gagit nerima vaksin nya seraya diuluka bala apai indai enggau pengibun sida.
Ba penemu Syarmila Tatarias ari SMK Matu madah diri chukup gaga udah nerima vaksin nya lalu ngarapka sekula ulih dibuka baru baka selama.
“Ngagai bala bakih ke bedau nerima vaksin anang takut lalu datai ngelawa palan meri vaksin ke semak,” ku iya.
Udah nya, Rosika Johari ari SMK Matu mega madah pengudah dituhcuk vaksin iya berasai lelak tang taja pia iya tetap meri teriam aksih laban udah mujur betuchuk vaksin Covid-19 nya.
“Arapka pengudah nerima vaksin tu, menua kitai majak suman ari keruga Covid-19, nyau lelengau amat asai ati deka pulai ke sekula betemu enggau bala bakih,” ku iya.
Nangkan ke nya, Tuai Rumah Bareng ari Bruan Tutus Matu madah iya chukup gaga enggau meri terima kasih ngagai perintah laban udah ngemujurka program meri vaksin nya.
“Asil ari pengawa meri vaksin tu, arapak semua kitai ulih diseliahka ari penyakit Covid-19. Sama-sama mih kitai nyaga diri,” ku iya.
Pia mega ba siku apai nembiak, Jemat Morris ari Rumah Bareng madahka iya lantang ati meda anak iya udah mujur nerima vaksin lalu ngarapka sida ulih nurun ke sekula baka selama.
Nitihka penerang, semua raban nembiak ke mujur betuchuk dos keterubah nya deka diasuh betuchuk vaksin ungkup dos kedua kena 2 Oktober ila ba endur ke sama.
