KUCHING: Bisi dua iku nembiak ari Universiti Teknologi Swinburne nurai sejarah baru pengudah nerima Anugerah Dermasiswa James Dyson ba Eksibisyen Taun Kepenudi diatur ujung bulan Mei tu tadi.
Projek inovasyen asil tengkebang Justin Sia Wei Kiat enggau Wong Yung En Lau ke mega nembiak robotik enggau mekatronik dipilih Yayasan James Dyson lalu dipadu nyadi penerima anugerah nya taun tu.
Bisi mega pengawa nyuaka anugerah ngagai pemenang Anugerah Pemeruan Rampa Menua Weida asil projek produk enggau servis inovatif sereta nangkup juluk pemansang meruan (SDGs) PBB.
Eksibisyen projek taun kepenudi nya mandangka peluang kereja sereta betemu enggau temuai ke bisi datai ba pengawa nya.
Entara pekara ti narit ati iya nya jurai ‘Buka masa depan anda dengan Ijazah Penyelidikan Pasca Siswazah Swinburne’ tauka dikumbai ngerandang pemansang nengah pelajar pansik Swinburne ti digulu lebih 300 penyereta baka nembiak, alumni enggau bakih kunsi industri.
Jurai nya udah dikenatai Pengelicha Kanan Injiniring Mekanikal enggau Penyeraris Industri Fakulti Kejuteraan, Pengkomputeran dan Sains, Dr Victor Bong enggau kerejasama nembiak baka Karen Kong Gah Hie, Bong Zhang Ru enggau Yeo Lip Siang.
Bisi mega jurai ‘Terangi Karier anda dengan Teknologi hijau’ tauka dikumbai ngerembai kereja kita nengah teknologi gadung mega diatur betuai ke Pakar Bakat enggau Operasyen Integrasyen Greatech (M) Sdn Bhd Trisha Goh.
