PENANYI veteran Iban ti chukup tebangkar nama, Penghulu Andrewson Ngalai nurai sejarah ba industri muzik Dayak pengudah diberi Tokoh Penyerakup Seni Budaya Anugerah Sri Apresiasi Seni Sarawak.
Berasai temegah endar kitai pengudah siku penanyi lama ke udah ngangkat industri muzik Dayak nyadi siku ari penerima anugerah Tokoh Perpaduan Seni Budaya ba Pengerami Anugerah Seni Budaya Sarawak (ASBS) 2023 ti diatur ba Dewan Santapan, Kunsil Nengeri (DUN) Sarawak.
Anugerah tu datai baru dikena ngaku enggau ngenang pasal bala pemekuh seni budaya ba Sarawak.
Nya kebuah, Kaban Kunsil Nengeri (ADUN) Tamin, Ir. Christopher Gira Sambang ba ruai Facebook iya meri pengaga ati enggau tabi puji ngagai Andrewson Ngalai laban udah diberi anugerah ungkup kategori Anugerah Sri Apresiasi Seni Sarawak.
“Chukup temegah enggau gaga ati pengudah meda rintai bala penerima anugerah tu.
“Penghulu Andrewson Ngalai, siku penanyi enggau komposer Iban ti endang patut diberi anugerah nya kelai ngenang jasa iya ba dunya pemerindang kitai Dayak.
“Tambah mega, Andrewson Ngalai tebilang enggau lagu Bekikis Bulu Betis ti dikerindu semua, ukai semina ba Sarawak tang mega ba menua luar.
“Ba dini-dini endur, kitai berasai temegah enggau gagit lebuh ninga lagu Bekikis Bulu Betis tu disada enggau didinga laban lagu Iban majak dikerindu mensia mayuh,” ku Gira.
Nya alai, Gira ngarapka pemujur enggau penyulut Ngalai ba industri muzik Dayak majak ditampung penanyi ke diatu dikena ngangkat industri muzik kitai.
Baka ditemu kitai, ba sebarang pengerami di Sarawak nyangka bisi ‘penimpang’ enti sema lagu Bekikis Bulu Betis tu enda didinga enggau disada.
Lagu tu mega chukup dikerindu laban semua penanyi temegah nyadaka lagu ba panggau antarabansa.
Nya alai, Andrewson Ngalai ngasaika anugerah tu ngaku lagu iya ti ukai semina ngangkat budaya Sarawak tang mega nyarih didinga mensia mayuh ba Semenanjung Malaysia enggau Sabah.
Andrewson Ngalai mega berasai gaga laban lagu ditengkebang enggau disada iya udah nerima anugerah ti chukup besai reti nya.
“Chara bala peminat enggau mensia mayuh nerima lagu tu jauh berubah ari suba nyentuk diatu.
“Aku enda ngadang lagu tu nerima sambut ti naka pemanah nyentuk ba renggat antarabansa,” ku Andrewson Ngalai ke mega siku orang lama ti teguh ngangkat industri muzik Dayak kenyau ari taun 1970-an.
Ku Andrewson Ngalai, kenang manis sekumbang nengkebang lagu iya nya lebuh lagu Biar Bekikis Bulu Betis nya disada Yang di-Pertuan Agong Al-Sultan Abdullah Ri’ayatuddin Al-Mustafa Billah Shah lebuh penemuai besejarah iya ngagai Rumah Raymond Plen rambau Kembara Kenali Borneo 2023.
Ba pengujung randau, Andrewson Ngalai meri terima kasih ngagai Opis Seni enggau Main Asal Sarawak (JKKNS) ti udah ngatur pengerami tu lalu andalka pengerami baka tu ulih ditampung ba taun baru.
Ke rikod, entara lagu disadaka Andrewson Ngalai kelimpah ari lagu Bekikis Bulu Betis iya nya Ukai Nasib Panjai Begulai, Beraie Nganti, Sengaja, Sepating Bungai Ke Tanda Tua, Enggai Jauh Nuan, Keran Ke Nuan, Ketup Lelabi Mati, Kena Jayau Tubuh Nuan, Nuan Dipilih Aku enggau ke bukai.
Entara anugerah ti disua nya Anugerah Tokoh Seni Budaya Sarawak, Anugerah Penyukung Seni Sarawak (Media enggau NGO) enggau Anugerah Sri Apresiasi Seni Sarawak.
Bisi mega Anugerah Nilakandi Seni Sarawak sereta Anugerah Nitih Pekara Seni (Seni Muzik, Seni Tari, Seni Teater, Seni Berbahasa, Seni Ngetanka Diri, Main Asal).
