KUCHING: Megafair Sarawak ti deka diatur ba Palan Konvensyen enggau Pemandang Suntec, Singapore kena 16 ngagai 19 Oktober tu nyadi pelasar ngeran- dang peluang meranak puku sereta kerejasama enggau pemeranak puku ari Singapore enggau antarabansa.
Sapit Sekretari Perintah Sarawak (Operasyen), Datuk Hii Chang Kee madah, karnival nya nyerangkung kongres dua hari (16 enggau 17 Oktober) enggau pemandang ti ngayan budaya, dagang temuai, produk Sarawak sereta gastronomi lokal baka laksa Sarawak enggau mi kolok.
“Kongres tu deka mantaika jurai ari sekretari mendam ari mayuh opis menteri nengah perati ngagai peluang pengawa meranak puku enggau kerejasama ti muntang dijapai pemeranak puku Singapore enggau antarabansa,” ku iya.
Hii nyebut pekara nya ba Sesyen Rentayan Kerejasama Dagang serimbai Misyen Dagang diatur Opis Dagang enggau Dagang Temuai Sarawak di Singapore (STATOS) sereta Balai Dagang enggau Industri Melayu Singapore (SMCCI), ditu ensanus. Nya kebuah, Hii ti mega Direktor STATOS minta pemeranak puku ari Singaporen ngambi bagi laban rejister pechuma nengah website STATOS.
“Kami nyelinting 700 diligit ungkup kongres nya lalu atrium deka dibuka ngagai semua,” ku iya.
Iya madah, pemandang nya deka nyendia 120 reruai ari ejensi perintah, meri peluang ngagai bala penyereta ngambi betanya enggau ngulu randau ti lenak agi pasal sektor ekonomi baka kuasa, industri servis enggau pelajar.
“Nya alai, aku ngarap ke kita nyempulang kami ba Megafair Sarawak ba Singapore.
“Peluang ti jarang nyadi, kita enda ibuh terebai kitu tang ulih terus ngagai Palan Konvensyen enggau Pemandang Suntec lalu ngambi bagi, mending sereta berati ke baka ni kitai ulih nanggam kerejasama,” ku iya.
