Ngulit tanda adat basa

Genap tubuh kitai mensia ti idup di dunya tu deka nemu jalai pemati lalu kitai bansa Dayak Iban bisi timpuh bebasaka pemati dikumbai ngulit.

Ulit tu deka ditanggam pengudah orang ti nganjung enggau numbakka antu ke pendam mulaika diri sereta datai ba rumah lalu udah terenah ngintu diri.

Sida ti dipadu nanggam ulit endang orang bepenemu pasal adat enggau tuai bulu ti kala basa jari tauka pegi belelang ke menua bukai kelimpah ngembuan penau ngereja pengawa.

Iya dulu agi berandau enggau orang ti ngempu penusah sebedau netapka berapa lama timpuh sida serumah deka ngulit enggau penyauh menua kena bungkur ulit sereta hari bulan ulit nya diketas.

Kelimpah ari bebasaka pemati, kebuah bukai kitai bansa ngulit dikena ngenyamaika ati sida ti ngempu penusah, timpuh sida ngaum ati beraie puang ditinggal diri sebilik midang ke batang mandai.

BEJALAIKA ULIT… Sida ti udah dipadu nurun begigaka sumbuk biru ti deka diira nyadika daun isang nyilih antu pala.

Enti kelia, orang ti ngulit tu deka nurun Kayau Anak dikena ngiga pala munsuh nyilih tubuh niang ti baru udah parai kelimpah sida serumah diau sunyi, nadai dinga ragak munyika jaku sema, baka orang ngulit.

Taja pia, nitihka serunyut pemansang jeman diatu, pengawa dikalih enggau penurun orang begigaka sumbuk biru ti diira nyadi daun isang kena nyilih pala munsuh ngagai menua ti kala alai orang ngayau tauka orang betempuh sereta bebunuh kelia.

Tang pengawa nurun begigaka sumbuk biru mega jarang dikereja laban tebal agi rebak diatu megai pengarap baru lalu ulit diketas ngena chara sembiang.

Enti sema ulit ditanggam agi ngena chara lama, pengawa deka dipuntang enggau utai bukai ti diasaika patut nitihka penemu orang ti megai ulit nya.

Suara Sarawak sekali tu ngemai kitai nikalka kenang sereta ngelansa gaya pendiau enggau pejalai pengawa sida ke tuai menya ngulit.

BEJALAIKA ULIT… Sida ti udah dipadu nurun begigaka sumbuk biru ti deka diira nyadika daun isang nyilih antu pala.

Kira seminggu sebedau ulit diketas, sida ti beempu pemati deka nesau kaban belayan diri baum netapka ni bagi menua endur begigaka sumbuk biru.

Lebuh baum mega, tubuh orang ti patut ngereja pengawa nya deka dipilih laban enggai nyadi nukuka sebarang orang enti iya bedau tuai umur lalu enda tau enda lelaki.

Ambika chunto, menua ti suah ditapat orang ngiga sumbuk biru baka di Bukit Sadok, alai Rentap betempuh ngelaban perintah Charles Brooke, Bukit Bangunan ti suah alai bala soldadu betempuh ngelaban komunis enggau Bukit Kelingkang suah endur soldadu betempuh enggau komunis kelimpah endur kitai Iban menya belaban bebunuh enggau orang ari menua Indonesia.

Sida deka sereta angkat ari rumah orang ngempu ulit lalu nirika pelasar alai ngenduh lebuh datai ba endur ditapat sereta begigaka sumbuk biru besemak endur nya nitihka pengelantang diri.

Pengudah bulih sumbuk biru sida lalu manjung ngeluluka diri baka orang kelia udah mumpung pala munsuh sereta beguai-guai mulaika diri ke menua.

NYILIH… Gaya daun biru ti deka diambi sumbuk lalu diira nyadika daun isang.

Sumbuk biru deka diselit ba sarung dulu diri empu nunda sida ke tuai menya engkah bulu pala munsuh, lebat bejurai kelai pemerani enggau penyikar.

Datai di menua tauka rumah empu ulit, sida tu tadi enda tau sesekali lalu niki ka rumah tang deka diau ba sebelah langkau kebun tauka di tanah seraya nganti dini hari tauka kira maya manang udah tembu belian sara bungai tang sebedau hari teberingkas tawas, tauka burung nyau didinga bemunyi.

Datai ba maya tau niki, orang ngempu pemati lalu nyendika tawak siti ti diengkah ba tengah ruai sida, chapak besai sesingkap ti udah diiri ai, labu rendam ti udah chukup rangkai sereta udah tau dikena nyauk enggau manuk siku lalu diengkah ba ruai nya mega.

Bala bukai lalu bebai nikika sida di tanah ti deka ngemai senapang, tuak sebutul enggau telu manuk sigi ngagai genap tubuh sida nya.

Bala ti ngambat pemulai sida udah sedia nganti ba pala tangga peniki ke rumah lalu nyelabu enggau nimbak senapang ke langgit sereta sida niki, ditimbal ngena panjung nyaris tiga kali nunda orang ti gagaka diri pulai ngayau bulih pala munsuh.

LUAS… Menua ti suah ditapat orang ngiga sumbuk biru endang kala endur orang ngayau, betempuh ngelaban munsuh.

Sida digenselan ngena telu manuk lalu diasuh makai telu manuk sigi siku sereta diberi ngirup ai tuak. Nyerumba senapang nya ditimbak berebak enggau sida ti niki, bala bukai ti nganti ba ruai deka nerantangka tawak nimbal sida ke ba pala tangga.

Sida ti ngambat enggau nurun ngambi sumbuk biri lalu bejalai betangkan niti ruai dataika nuntung ba ruai bilik ngempu ulit ti deka diketas.

Sida manjung baru tiga kali lebuh datai ba ruai nya sebedau nudukka diri dia lalu dibiau orang ngempu ulit ngena manuk. Pengudah dibiau, siku ari sida ti udah dipadu nyadi ketuai diasuh ngetas ulit lalu tama ke bilik ngambi kebuk tauka baku ti dikena orang nanggam ulit suba lalu ngemai utai nya pansut ke ruai.

Datai di ruai iya lalu muka tungkus ulit seraya pengawa ngetas ulit pan berengkah dipejalai. Udah semua ulit diketas, utai ti nyadika ulit disimpan dalam labu lalu dianjung ngagai alai engkah ulit ti udah diketas, sungai tauka pendai lalu ngeraratka labu nya.

Tembu pengawa nya, iya mulaika diri ke rumah. Datai di rumah, iya lalu nyengkau semua daun isang ti diira ari sumbuk biru lalu diengkah begulai enggau antu pala dikemisi sida serumah.

Nyadi pengawa belian sara bungai nandaka sida ti pulai bejalai enggau orang ti ngetas ulit tembu seraya bala mayuh mega dinah makai pagi.

Tembu makai pagi baru orang berengkah ngereja pengawa muai tebalu lalu ditangkan ngambi tebalu enti pengawa tu bisi dikereja.

Tang enti sebayan ti diulit nya endang udah balu, pengawa tu enda dikereja kelimpah ari sida kaban belayan ti ngambu pangan diri nyadi kaban belayan ngena adat ba mua orang mayuh.

Ari rurun pengawa tu, rebak baru patut belajarka adat lama ngambika nemu reti, kebuah sereta tuju kitai ngulitka orang ti midang.

Taja udah bisi pengarap baru, kitai enda patut ngelengka pengarap lama, abis nadai nemu seling reti enggau tuju iya laban genap adat enggau chara sida ke tuai gawa menya endang bisi lebas enggau kebuah ti mangka pengidup kitai besehari sehari.

Belajarka adat enggau pengarap lama tu enda ngasuh nuan tinggal sesingkang ari pemansang dunya injau tang nuan deka nempa diri nyadi orang ti bepenemu, bebasa enggau ngenang sereta ngetanka pesaka enggau lanting aki ini kitai menya.

Suara Sarawak