JULUK deka negika nasip raban indai tunggal ngujung ke siku Pemantu Pengawa Beputung Ngeli ba Klinik Ngeli Kanowit, Noreeny Manggi, 37, mutus ati masuk Pekit Queen of the World Sarawak (QOTW).
Iya berasai temegah meda penyulut Mrs Global Asian 2023, Kimi Tomas ti nyadi indu Iban keterubah champion ba panggau antarabansa nengah pekit nya.
CHAKAH NEGI NASIP INDAI TUNGGAL
Nya alai, ketegal teperansang meda penyulut Kimi, dia iya milih pelasar QOTW dikena negika nasip raban indai tunggal di sebaka nasip enggau iya.
Iya ti rindu agi dikangau Noreen nya madahka diri bisi meda poster nguji penau QOTW ti dikunsika Kimi lalu nguji ke nasip diri masuk pekit nya.
“Aku nemu mayuh indai tunggal kelebih agi ba menua tu napi pemar lalu sada sida enda nyarih didinga.
“Nya kebuah aku milih pekit tu nyadi pelasar dikena aku mantu, negika nasip enggau mai sada bala indai tunggal ngambi nyarih agi didinga kelimpah mai main asal Iban ngagai panggang antarabansa.
“Taja pen enda mujur bulih sebarang penuduk ba pekit tu tang nya enda ngemuntanka juluk aku deka negika nasip enggau meri peransang ngagai raban tu sereta nyaguka main asal Iban ngambi dikelala dunya,” terang iya.
Indai ngagai dua anak nya madahka diri deka chakah agi nguji ke nasip diri ba pekit nya enggau pekit bukai dudi hari.
Ungkup penerang, Noreen kala dipadu nyadi champion Pekit Kumang Gawai Indai Orang 2023 ti diatur ba Sibu serimbai Pengerami Gawai tu tadi.
BELAJAR PEKARA BARU
Sekumbang ngaul Pekit QOTW nya, mayuh pekara enggau peneleba baru dipelajar sereta diasaika iya.
Siti ari pekara nya, ku Noreen, pekit nya mantu iya ngedutka pemanah kaul enggau komuniti Iban sereta belajarka bemacham adat enggau main asal Iban.
“Sebedau masuk renggat kepenudi pekit tu, aku bepeluang belajar ngajat dikena nyikap diri ba pekit tu.
“Aku ngarap rebak biak enggau rebak dudi ransing belajarka adat enggau main asal bansa diri ngambi enda punas disegang pemansang.
“Sida patut ngena bemacham pelasar lalu siti ari nya baka Pekit QOTW tu ngambi adat enggau main asal sida majak dikelala mensia mayuh di serata dunya,” ku iya.
Ngena peluang tu, Noreen beterima kasih ngagai semua orang ti nyukung iya sekumbang ngaul QOTW kelebih agi tim penganta iya ti betuai ke Alexson Hawell, sida sebilik, bala bakih, bakih sama gawa enggau ti bukai.
“Terima kasih ngagai kita semua ti enda leju meri sukung penuh ngagai aku sekumbang pekit tu ngarap Tuhan merekat kita semua,” ku iya.
Sebedau ngujung ke randau diri, Noreen meransang raban indu ransing masuk pekit Kumang ba renggat ti besai agi dikena nyingkang ke mua.
