KUCHING: Kaunsil Pengeraja Asal enggau Rampa Menua (NREB) benung ngemanah Atur Pengawa Standard (SOP) dikena matau Pengawa Nyerenih Empas Rampa Menua (EIA) sereta Atur Malin Nyerah enggau Nyerenih Ripot Pengawa Matau Rampa Menua (EMR).
Sapit Menteri Perambu Mengeri, Pengatur Tanah enggau Rampa Menua Sarawak, Datuk Len Talif Salleh madah, inisiatif nya dikena nyeraris pengawa meresa, negap sukut ripot enggau nentuka atur nerit dipejalai chara berurun enggau konsisten.
Ku iya, EIA nya guna atur undang-undang enggau instrumen beguna nentuka pemansang meruan ba Sarawak.
Ku iya, naka suku ketiga taun 2025, NREB udah nerima 61 ripot EIA sereta 15 Pelin Pengatur Rampa Menua (EMP). Lalu ari penyampau nya, bisi 46 ripot EIA enggau 15 EMP udah dikemendar seraya 15 ripot EIA da ba bemacham renggat nyerenih.
Nya kebuah, Len Talif madah, NREB udah bejalaika 918 pengawa matau pengudah EIA lalu udah nerima 1,857 EMR nentuka atur ngemendar EIA dititih ba timpuh Januari nyentuk Oktober 2025.
“Asil matau tetemu ke 87 kes enda ngasi ke atur enggau notis udah dikeluar ba penyalah nya.
“Ba timpuh sebaka, 14 keretas pansik udah disedia seraya lapan kes udah dikompaun berega RM150,000,” ku iya.
Len Talif nyebut jaku nya lebuh nyimpul jurai opis menteri iya ba Aum Kunsil Nengeri (DUN) Sarawak, ditu kemari.
Nambah ke nya, ku iya, NREB netapka atur penuh Audit Ngasi Rampa Menua (ECA) ungkup sektor kampung ba Sarawak.
Ku iya, bisi 63 ECA Audit udah diadu naka Oktober 2025. – NICK FLETCHER
