BETONG: Perintah Sarawak seruran ngemeratka pengelikun enggau pengelantang rayat ba menua pesisir.
Pekara nya ulih dipeda nengah pejalai Sapit Premier Sarawak, Datuk Amar Douglas Uggah Embas ngabas taba Projek Jematan Lambung Bedarat ba Sekula Primari (SK) Nanga Gayau, Betong.
Tuju pejalai ngabas dikena matau projek ti beungkus RM2.38 juta ti dipejalai Opis Kereja Raya (JKR) Bagi Menua Betong, dikena nyamin pengelikun sereta meri pengelantang ngagai nembiak sekula, pengajar enggau peranak dia.
Projek ti digaga SARAOIL (M) Sdn Bhd tu mungkur pengawa ngaga jematan lambung bedarat baru pemanjai 36.4 meter sereta peninggi 5.7 meter.
Perengkaguna tu mega disikap ngena perabung, pagar pengelikun, sistem lampu, enggau ke bukai dikena nyeliah penusah bebadi ba jalai alun sereta nyamin pengelikun nembiak sekula ninting hari.
Uggah mega madah, projek nya nyadi sebagi ari pengawa perintah Sarawak ngemansang menua pesisir.
Ku iya, nya nentuka rayat ba menua ulu mega ulih ngasai ke infrastruktur moden sereta bekualiti.
Iya mega madah, agih belanja ti diberi nengah Ejensi Pemansang Bagi Menua Betong (BDDA) nya bukti pengeransing perintah ngubah tikas pengidup rayat nengah pengawa nyendia perengkaguna ke sistematik.
Tandu iya, pemansang infrastruktur nya ukai semina meri pengelantang, tang mega nyadi penyungkak ngagai pemansang sosial enggau pelajar komuniti menua pesisir ba Betong.
Projek tu disadang tembu 14 September 2026, lalu deka meri penguntung ngagai peranak menua nya nipak juluk Perintah Sarawak ke deka mai pemansang ngagai semua rayat.
