DALAT: Nengah agih belanja pemansang sepenyampau RM40 juta, kampus baru Palan Penyulut Teknologi Sarawak (CENTEXS) Dalat diatu rasmi beoperasyen.
Kampus baru nya nganti palan latih sementara kenyau ari taun 2019 sereta nyendia 16 program latih, setipikit CENTEXS enggau diaku antarabansa.
Premier Sarawak, Datuk Patinggi Tan Sri Abang Johari Tun Openg diberi basa bejadi kampus baru nya ensanus kelimpah mandang komitmen perintah nengeri negap pemansang modal mensia sereta pengelandik seriris enggau transformasyen sosioekonomi Sarawak.
Chairman CENTEXS, Tan Sri Mohamad Morshidi Abdul Ghani madah, entara program ti disedia nyengkaum Setipikit Profesional ba Teknologi Pisin (Pemun) enggau setipikit ari Institut Penyulut Dagang (IBE) UiTM sereta The Textile Institute (TTI), United Kingdom.
“Pia mega, bela disedia iya nya Setipikit Latih Nyaga Orang Tuai (TREC) enggau setipikit ari Universiti Global Pengawa Belajar Seumur Idup (GULL), Amerika Syarikat sereta Setipikit Pengelandik Malaysia Tikas 3, Setipikit Ngaga Bot Fiberglass enggau setipikit Qualify United Kingdom.
“Bela bisi disedia iya nya tiga program jaku ti mungkur Jaku Inggeris, Melanau enggau Mandarin,” terang iya serimbai Program Ngelanchar Kampus Baru CENTEXS Dalat ditu, ensanus.
Tampung iya, guna pengelandik teknologi baka elektrik, pemun pisin, nyambung tali karan, pemakai enggau kulinari sereta pengawa ngelaku digital beguna amat dikena nyukung industri lokal di Dalat enggau besemak dia.
Ku iya, guna program ungkup nyaga orang tuai mega diberi perati laban Sarawak deka nyadi menua tuan manggai 2028 ti melabaka 16 peratus ari 2.8 juta peranak di Sarawak endang orang tuai. “Di Sarawak, bala orang berikan ti berejister naka taun 2024 di Opis Berikan Tasik iya nya 10,828 iku.
“Urung 30 peratus ari sida ngena bot fiberglass lalu pengawa ngena fiberglass tu majak ngerembai.
“Nya alai, Setipikit Ngaga Bot Fiberglass tu beguna amat ba komuniti orang berikan di Dalat enggau besemak dia,” tampung iya baru.
Pia mega, ku iya, naka sehari tu, CENTEXS ngembuan enam kampus di selampur Sarawak baka di Kuching, Lundu, Betong, Lawas, Mukah enggau Dalat lalu enda lama da Betong deka bisi kampus baru.
Terang iya, genap kampus bela ngembuan sektor ti diberi perati kediri empu.
“CENTEXS Mukah mungkur guna industri lokal di sitak Mukah, Bintulu enggau Miri ti meri perati ngagai minyak enggau gas, sektor betanam betupi sereta akademi kuasa gadung enggau digital.
“Naka diatu, penyampau nembiak di CENTEXS Mukah ti udah ngambi program nya bisi 2044 iku lalu CENTEXS Dalat mungkur guna industri di sitak Dalat, Matu, Daro, Kapit, Sibu, Sarikei enggau Tanjung Manis,” ku iya.
Morshidi madah, CENTEXS Dalat disikap enggau fasiliti baka 10 bilik kuliah, empat bengkel, dua bilik aum enggau buding ti ulih ngengkah 200 nembiak.
“Kampus tu bela nyendia fasiliti bukai baka lima begunan lab iya nya teknologi welding, elektrikal, digital, pisin enggau palan jaku, kafeteria, surau, balai mayuhguna, begunan atur pengawa sereta langkau jaga,” tampung iya.
