BINTULU: Sarawak diatu benung nyerungkai pemansang teknologi baru panel solar ti ulih meri penampak lebih lama iya nya manggai 12 jam ti enda ibuh bepanggai ba sistem nyimpan bateri.
Premier Sarawak, Datuk Patinggi Tan Sri Abang Johari Tun Openg madah, perambu nya udah diperunding iya enggau Mandal Canselor Universiti Kebangsaan Malaysia (UKM) begulai enggau raban pemansik ti ngembuan pengelandik ba bidang kuasa semikonduktor.
Ku iya, teknologi solar diatu semina ulih tan urung empat jam udah nya iya begunaka sukung Sistem Nyimpan Kuasa Bateri (BESS).
“Nya alai, aku meri sadang penemu ngagai sida ngaga pansik sekali ke sida ulih ngasilka panel solar, ari panel solar ti semina ulih tan urung empat jam ti enda agi disukung ngena bateri BESS.
“Laban sida tu pakar, aku madah kitai bisi kereban ti dikena ngasilka silika, silikon.
“Kelimpah ari nya, kitai mega engka bisi kereban mata ti ulih dihibrid, ti dipelaba ulih ngemanjaika timpuh kuasa nya ari empat ngagai urung 12 jam.
“Reti nya nuan enda begunaka bateri agi. Iya (kuasa nya) deka nyadi pemekal kuasa ti tetap,” ku iya.
Abang Johari bejaku munyi nya ba aum pemberita pengudah tembu bejadi Program Sarawakku Sayang di Taba Padang Bilun Lama Bintulu ditu, kemari.
Iya ti mega Menteri Kuasa enggau Pemeruan Rampa Menua madah, pengawa nyerungkai teknologi tu begunaka pansik ti silik, kelebih agi dalam bidang ‘metalurgi’ dikena mansik ‘sifat pasir silika’ enggau kereban besi bukai dikena nambahka kapasiti nyimpan kuasa.
“Tu tau nyadi teknologi baru ti ulih ngalahka makit laban aku ulih meda nya ari komputer ti dikumbai kitai superkomputer.
“Nya bepelasarka pengelaju penampak, ‘real time’. Enti pekara tu ulih nyadi, nyangka pekara tu mega tau nyadi ba kapasiti nyimpan kuasa,” ku iya.
Ku Abang Johari, iya diatu nyerahka pekara nya ngagai raban orang ti landik ba UKM. Sama bisi datai Sapit Menteri Besai, Datuk Amar Fadillah Yusof, Sapit Premier Sarawak, Datuk Amar Douglas Uggah Embas, Datuk Amar Awang Tengah Ali Hasan, Datuk Amar Dr Sim Kui Hian, Speaker Kunsil Nengeri Sarawak, Tan Sri Datuk Amar Mohamad Asfia Awang Nassar, Menteri Industri Pemakai, Komoditi enggau Pemansang Kandang Menua Sarawak, Datuk Seri Dr. Stephen Rundi Utom enggau bala bukai.
