KUCHING: Serikat teknologi, OpenMove AI bisi niat nanggam kerejasama strategik enggau ejensi di Sarawak, nyukung agenda transformasyen ti benung dipejalai perintah nengeri.
Chairman OpenMove AI, Tengku Tan Sri Datuk Mohamad Rizam Tengku Abdul Aziz madah, tuju penemuai basa ngagai Premier Sarawak, Datuk Patinggi Tan Sri Abang Johari Tun Openg berandauka langkar kerejasama ti ulih diadu begulai enggau ejensi Perintah Sarawak.
Ku iya, kerejasama dikerandau sehari nya nguing ngagai pengawa nyendiaka servis pakar bekaul agenda transformasyen.
“Randau tadi manah amat lalu kami bela nerima sanding penemu ari Premier minta randau silik diatur begulai enggau ejensi bekaul.
“Nyangka kami bekerejasama enggau ejensi Perintah Sarawak ngambi nyaup ngemujurka agenda transformasyen sida,” terang iya.
Rizam nerang pekara nya ba aum media pengudah ngatur penemuai basa ngagai Premier Sarawak di Kompleks Satria Pertiwi, Petra Jaya, kemari.
Iya madah, OpenMove AI bisi niat nempa kerejasama strategik laban Perintah Sarawak dulu bejalaika agenda transformasyen digital bepelasarka mayuh inisiatif enggau pengawa ti udah digaga.
“Kami sedia bekunsi pengelandik ba sekeda pekara bekaul transformasyen nengah chara bepelasarka pengelandik enggau asil pengawa nembiak menua tu ti nyadi pengelebih ba kerejasama deka diserungkai,” ku iya.
Sama datai, Mandal Presiden Kanan Movenet (Malaysia) Sdn Bhd, Steven Lim Kee Seng; Mandal Presiden Movenet (Malaysia) Sdn Bhd, Dr Ts Muhammad Fadhli Abdul Malek enggau S. Chandra Bogar Samuel Swaniadian. – EDISI UKAS
