Menua benak pangka pasang ti tebilang dikangau Simanggang, agi ngembuan pesaka tekstil ti jarang amat dipeda enti dibanding enggau pua kumbu tauka kain asal Sarawak ke bukai. 

Pesaka nya mih Baju Kuas, sebengkah ngepan asal ti mengkang ditan enggau diibun raban bansa Iban Balau nyadi ke kelai, identiti, pemanah sereta penanda adat ti disulur ari aki ini menya.

SENI SULAM

Nitih pansik Profesor Madya Dr Chemaline Usop ba taun 2006, sejarah raban bansa Iban Balau berengkah ari Gelungan.

Nyadi Gelungan tu siku tuai raban bansa Iban ke mai bala iya mindah ari Merakai, siti anak sungai Kapuas, sebedau berengkah ngerumpang menua lalu numbuhka genturung pendiau ba Bukit Balau. 

Ari pendiau keterubah nya meh bisi raban Iban Balau ti diatu nguan sitak menua Pantu, Lachau, Banting, Lingga, Undop enggau sekeda endur bukai ba Bagi Menua Sri Aman.

Ba rebak Iban Balau menya, Baju Kuas tu suah dikena raban indu ti bisi pangkat tauka bisi pemisi, laban ungkus ngaga iya mar sereta begunaka pengelandik ti tinggi. 

Baju ti bisi pelanin mandarin tu dikena ngenapka kereban Ngepan Iban maya pengerami Gawai Dayak, melah pinang, pekit ngajat enggau pengawa adat bukai. 

Tetiap lambar baju nya endang mandangka pengalus seni sulam ti ditampung ari siti serak ngagai siti serak.

ATI MESETI PUH

Ba penemu Julia James, 72, asal ari Banting, pengawa ngaga selambar Baju Kuas tu ukai semina begunaka pengelandik nyulam, tang mega begunaka pengeliat ati, penajam mata sereta mayuh peneleba. 

Lebih ari 40 taun Julia ngembuan peneleba dalam pengawa tu, dikena nentuka tetiap asil jari bisi kualiti ti tetap manah sereta ngembuan nilai pesaka.

Ku iya, pengawa ngaga baju tu berengkah ari ngelakar chura buah tauka motif ba atas keretas pola sebedau dipindahka ngagai kain baldu chelum. 

Chura ti dipilih mayuh bepelasarka rampa menua baka pampang kayu, puchuk paku enggau bungai, ti mandangka kaul rat entara bansa Iban enggau rampa menua.

“Menya, semina ubung emas dikena. Ubung nya tebal agi ari ubung ke selama, dikempat nitih pemanjai sebedau dijait ba atas kain ngambi ke ubung nya timbul,” ku iya.

Julia nerang, ubung emas nya baka tukuh spring ti alus.

Jerumat enggau ubung ditusuk ba tetiap lambar ubung emas enggau lurus sebedau disulam ba kain baldu chelum. 

Enti bisi pengilap mimit maya nyulam, iya ulih ngachau semua chura ti benung digaga.

Iya mega madah, semua pengawa nya dikereja ngena sulam jari sereta nadai ngena gam, taja bisi ngena gala enggau leka manik. 

Peneleba enggau pengalus jari nya mih ti ngasuh ninting lambar Baju Kuas ulih berega datai RM1,500. 

Kelimpah ari nya, kain baldu chelum ti dikena mega meseti bisi kualiti tinggi, teguh, ngambi ke chura iya enda mudah luya.

SEGANG PEMANSANG

Taja pia, ubah ti nyadi ba dunya mega mai transformasyen ngagai seni sulam Baju Kuas tu. 

Enti suba, semina ubung emas dikena, diatu mayuh orang ngena ubung ke bemacham chura baka biru, pirak, mirah enggau mirah muda. 

Buah tauka motif chura mega ditambah enggau jurasi gala sereta manik nunda peminta orang ke ngena, tang gaya asal baju tu tetap ditan enggau meruan.

Ubah nya muka jalai ngagai Baju Kuas ngambika terus ngerembai sereta dikena dalam pengawa adat diatu.

Mayuh woksyop ngaga kraf pengelandik jari diatu udah diatur raban Kolej Komuniti, gerempung ukai dikuasa perintah (NGO), orang ke ngaga kraf enggau ejensi Perintah Sarawak.

Inisiatif sida nya dikena nentuka penemu nyulam tu mengkang disulur ngagai nembiak rebak baru.

NALI ADAT ASAL

Ba Angela David Linggi, 48, siku pengaga kraf jari ti mega pelatih HRD Corp Train the Trainer (TTT) ba Sri Aman, pengawa ngaga Baju Kuas tu enda ulih diserara ari sejarah enggau penemu dalam bansa Iban empu.

Bepelasarka pansik sereta jerita ari orang tuai ba Sri Aman, iya nerang kain baldu chelum dikena maya pengawa miring.

Miring nya endang adat asal bansa Iban dikena meri terima kasih, minta pengelantang sereta bebasa ke semengat aki ini nitihka pengarap lama.

Angela mega madah, indu Iban Balau suba deka ngena Baju Kuas besereta enggau kain Empetut. 

Sebedau kain Empetut ditenun, ubung nya deka ditanam ke dalam tanah dulu dalam beberapa hari dikena ngulihka chura ti deka dikena.

Ngepan nya deka disempulang enggau sugu tinggi, lampit, rawai, tumpa, gelang lengan enggau gelang kaki. 

Ngepan asal tu suah dikena maya pengawa miring, lebuh bala indu ke tanju mai piring diberi ngagai Petara.

Ba raban bansa ti agi megai pengarap lama suba, penti pemali sereta lalau adat ninting hari amat dikemeratka nyadi lalau pengidup bansa Iban.

“Niang aki aku menya kala bepesan madah ke orang ke ngaga kraf enda dikemendar ngaga motif jelu tauka nunda gamal mensia ti agi idup, laban dipechaya ulih mai penusah ngagai orang ti ngaga tauka ngena kraf nya,” ku Angela ti datai ari Geran Stumbin, Sri Aman.

Pengarap tu nerang kebuah mayuh motif asal kraf jari Iban lebih mayuh nunda tukuh geometri, rampa menua tauka utai tumbuh.

“Enti kitai meda marik empang tauka tangu diatu, bisi ti ngena motif belengkuk Kalong Kelawit-Kawit.

Chura nya ke amat iya datai ari bansa Orang Ulu. Tang, identiti asal chura Iban ba perengka ngepan tebal agi ngena tukuh geometri aja.

“Udah nya, chura sulam Baju Kuas mega ngena motif utai tumbuh laban bepelasarka rampa menua ngelingi rumah panjai ti dipeda sereta diteladan ulih orang ke nyulam,” ku Angela ti udah lebih 11 taun ngajar seni kraf jari Iban ba Bagi Menua Sri Aman.

Angela ngarap nembiak rebak baru diatu ukai semina belajar ngaga kraf jari aja, tang mega patut mereti sejarah, lalau pengidup enggau nilai adat ti bisi ba motif kraf ke digaga. 

Ku iya, penemu nya deka nentuka pesaka tu terus diintu lalu enda lenyau ari identiti asal iya.

BEBASA KE PESAKA

Pekara nya mega nyungkak ati Moureen Bali, 41, siku injinir ari Gayau, Pantu, belajar penemu seni sulam Baju Kuas.

Taja iya kiruh enggau pengawa injinir, iya tetap ngiga awak dikena ngaga Baju Kuas nyadi tanda bebasa ke pesaka ruang bilik iya.

Ku iya, tetiap kali jerumat dipegai lalu iya berengkah nyulam kain baldu, perati iya deka lekat ngagai seni sulam nya.

Maya nya, pengelelak gawa sehari-ari tau lenyau, diganti enggau asai ti lantang lalu ngujungka iya semak agi enggau pesaka asal nyadi indu Iban Balau.

Pengerindu iya nyulam tu berengkah pengudah nyereta kelas kraf jari ti diatur Angela David Linggi ba taun 2025, kelimpah ari nerima iring ari indai iya empu, Lambat Labun, 68, ti landik ba bemacham seni kraf jari asal.

“Indai sigi udah lama bepesan ngambika enda ngaga motif jelu tauka gambar ke nunda gamal mensia ti agi idup, baik ba chura anyam, ukir, tenun, sulam tauka nama-nama kraf jari Iban.

“Pesan nya semampai dikeingat aku diatu.

Tambah mega, Cikgu Angela bisi ngajar motif ba Baju Kuas semak agi enggau chura utai tumbuh aja,” ku Moureen.

Taja iya agi baru ba pengawa tu, asil sulam Moureen udah ulih matak perati peminat ari bemacham raban bansa enggau endur baka Bintulu, Miri enggau Kuching. 

Asil jari iya mandangka pemanah seni Baju Kuas ulih ngilah ari raban bansa sereta dipebasa mensia mayuh.

Ba penemu Moureen, pesaka nya deka terus idup enti diberi jalai dikena mansang nitih ubah dunya.

“Nengah nambah chura ubung sereta ngena jalai ngaga ti lebih moden, inovasyen enggau pengawa ngaga Baju Kuas mega patut mansang sereta. 

“Inovasyen ukai tuju deka ngubah identiti asal, tang deka ngerembaika pesaka asal tu ngambika terus dipebasa ulih nembiak rebak dudi,” ku iya.

MAJAK DITAN

Pengadang nya mandangka pejalai Baju Kuas kemaya ari tu.

Pesaka ti kala ngerembai ba ruai rumah panjai diatu udah berengkah nuju ke panggau besai agi nengah pengawa belajar, pemandang, pekit enggau bemacham inisiatif ngintu adat asal.

Nya alai, Baju Kuas patut terus nyadi kelai identiti raban Iban Balau, kelebih agi ba pekit Kumang Gawai enggau platform adat bukai. 

Chara tu ulih mandangka pengalus seni sulam tu ngagai mensia mayuh ba Malaysia, sereta nentuka penemu, nilai enggau sejarah ti bisi ba ninting jait ubung sulam terus diturunka ngagai nembiak rebak dudi.

Seagi bisi jari ti landik nyulam enggau ati ti bebasaka pesaka aki ini menya, Baju Kuas deka terus nyadi saksi ngagai pejalai panjai pengidup raban Iban Balau. 

Tetiap lambar baju ke digaga mai jerita senentang asal penatai, pengarap, pengelurus enggau pengerindu ngagai adat ti terus idup. LYDIA HUMPHERY TUNGKAT