KUCHING: Arapka bisi produser ari Amerika tauka produser tebilang bukai deka bekerejasama ngaga filem baru ba Amerika enggau Eropah, ku Direktor Filem, Ray Lee.
Iya madahka diri chukup gaga enggau gagit ati pengudah nerima email pasal Filem Belaban Hidup ke deka dipandang ba pengerami filem tebilang di Los Angeles nya.
Iya ngarapka sida ke meda filem nya deka mereti enggau ngenang pemanah sereta kualiti Filem Belaban Hidup lalu ulih bekerejasama ngaga filem baru ba menua Eropah enggau Amerika.
“Kebuah pia laban sida ke meda Filem Belaban Hidup ba Asian World Film Festival nya orang ke tebilang baka produser, orang ti dipebasa, artis ke ngentapka diri ba Los Angeles.
“Nya kebuah, aku chukup temegah ati pengudah nerima email madahka filem tu deka dipandang pengelama tiga hari ba Los Angeles.
“Ngarapka sida ke datai meda Filem Belaban Hidup deka meri sukung penuh ngagai filem Dayak keterubah tu.
Nya mih jaku dikenatai Ray Lee lebuh dirandau Suara Sarawak pasal Filem Belaban Hidup deka dipandang pengelama tiga hari ba Asian World Film Festival.
Ku iya, Filem Belaban Hidup tu deka dipandang ba pengerami filem nya berengkah ari 21 ngagai 23 Mei tu, jam Malaysia.
