KUCHING: Premier Sarawak Datuk Patinggi Tan Sri Abang Johari Tun Openg nerima manah berita pasal Sultan Johor Sultan Ibrahim Iskandar dipilih nyadi Yang di-Pertuan Agong ke-17 ungkup timpuh lima taun berengkah 31 Januari 2024.
Ku iya, orang Sarawak endang bebasa ngagai raja lalu berita nya endang diterima rayat menua tu enggau manah.
“Baka nya mega timbal kitai ngagai agong bukai, kitai orang Sarawak endang bebasaka raja,” ku iya.
Abang Johari bejaku munyi nya lebuh ditanya pemberita pengudah ngemataka Pengawa Nyain Sempekat Pemereti Ati (MOU) Ungkup Pengatur Servis Penerebai Menua Pesisir ba Perolehan Saham dalam Maswings Sdn Bhd di Palan Aum Borneo Kuching (BCCK) ditu kemari.
Kelimpah ari nya, lebuh ditanya baikka iya deka Program Pejalai Kenali Borneo deka diteruska ba Sarawak, Abang Johari nyaut pekara nya bepanggai ngagai agong empu.
“Bepanggai ngagai agong ti baru meh, kitai endang ngelaluka penatai raja kitai nya bejalai ke Sarawak,” ku iya.
Dulu ari nya, rambau Aum Kaunsil Bala Raja ke-263 (Khas) ba Istana Negara pagi tadi, Sultan Ibrahim Iskandar dipilih nyadi agong baru.
Iya dikeandal ngempu pangku pengawa nya ketegal timpuh servis Yang di-Pertuan Agong Al-Sultan Abdullah Ri’ayatuddin Al-Mustafa Billah Shah kediatu deka tembu kena 30 Januari taun baru.
