KUCHING: Ordinan Sarawak Ombudsman deka diterit pengudah nerima pemendar (assent) ari Tuai Pemegai Menua (TYT) Sarawak, Tun Abdul Taib Mahmud.
Taja pia, ku Sapit Menteri ba Opis Premier Sarawak (Integriti enggau Ombudsman), Datuk Dr Juanda Jaya, haribulan neritka ordinan nya deka ditentu Perintah Sarawak pengudah nya.
Ari sukut struktur ordinan nya, ku iya, nya mungkur Tuai Ombudsman, Sapit Tuai Ombudsman sereta tiga nyentuk lima ombudsman ti bukai ti dichiri TYT Sarawak ungkup timpuh tiga taun.
“Enti ari sukut atur pengawa, siku Tuai Pengatur Pengawa ari raban orang gawa perintah deka dichiri menteri ngatur Opis Sarawak Ombudsman,” ku iya.
Dr Juanda mansutka jaku nya rambau nyaut tanya ADUN Satok, Datuk Ibrahim Baki bekaul pengawa neritka Ordinan Sarawak Ombudsman ba Aum Kunsil Nengeri (DUN) Sarawak Ke-19 ditu, kemari.
Ngelansa senentang Pelin Nagang Penyalah Makai Suap Organisasyen (OACP), ADUN Jemoreng nya madah, nya sebengkah dokumen polisi nagang penyalah makai suap lalu mutar penanggul enggau pengelemi atur pengawa sereta integriti ba renggat organisasyen.
Dikena ngemansang OACP, iya madah, sebuah organisasyen patut ngelala dulu empas enda manah lalu ngaga pengawa meresa empas nya ti ulih nyungkak ngagai isu atur pengawa, integriti enggau makai suap dalam organisasyen nya.
