Pagar ba adan menua Sarawak-Kalimantan didiri ba palan strategik

KUCHING: Sapit Kepala Menteri Tan Sri Datuk Amar Dr James Jemut Masing madahka perambu nirika pagar ba sepanjai adan menua Sarawak enggau Kalimantan semina digaga ba palan strategik.
Ku iya, pagar nya deka diri ba endur ke mudah endur kampar tama baka tanah landai lalu ukai ba semua adan menua enggau Kalimantan penyauh 1,032 kilometer.
“Adan nengeri berengkah ari Telok Melano nyentuk Lawas nya penyauh 1,032 kilometer.
“Bisi sekeda endur nya dibungkur kampung tang endur ke mudah endur kampar tama nya tanah landai ari Telok Melano ngagai Lubok Antu.
“Nya kebuah, aku ngabas ngagai adan menua di Telok Melano.

NGABAS ADAN MENUA… Masing bediri ba jalai adan menua Telok Melano lebuh meresa sebuah rumah di Jalai Tentera Nasional Indonesia (TNI).

“Lebuh bediri ba tanah Malaysia, aku ulih berandau enggau siku indu Indoensia ke alai rumah iya semina sepiak batu ari adan menua.
“Nya mih takah ke semak amat lalu kitai enda ulih nagang sida pansut enggau tama ke Sarawak,” ku iya lebuh dirandau, Hari Empat tu tadi.
Masing ti mega Ketuai Komiti Pengelikun Adan Menua madahka pengirau ati meda kampar tama nengah adan menua ke mai igi penyakit Covid-19.
Terang iya, penerang ari Komiti Penyangga Penusah Nengeri Sarawak (JPBNS) nunjukka kes ti diimport ari Kalimantan ngagai Sarawak nadai kurang ari 30 peratus.
Masing madah pengawa nirika pagar nya aja chara engkeman dikena mutarka penanggul kampar tang atur bukai mega patut diterit.
Ku iya, tu nyengkaum neritka atur ba adan menua, ngaga jalai alun ba adan menua sepanjai 1,032 kilometer, nirika mayuh agi Kompleks Imigresyen enggau Palan Kuarantin (CIQ) ti disikap perengkaguna moden nyengkaum bekerejasama enggau Perintah Indonesia.
“Pekara tu nentuka kitai ulih nyaga pengelikun rayat Sarawak sereta nyaga pemanah kaul bebakih entara Malaysia enggau Indonesia.
“Kitai enggaika kampar tu ngenataika penanggul baka ngerusak kereban kitai baka ba adan menua dudi hari.
“Nya kebuah, kitai mesti sedia tumu lalu nya kebuah aku minta nyikap jalai alun ba adan menua beungkus urung RM24 juta ngambi ulih neritka atur pengelikun ba adan menua kitai,” terang Masing.
Masing ti mega Menteri Pemansang Infrastruktur enggau Palan Penyangkai Kapal madahka iya udah berandau enggau Perintah Besai ngambi nyikap jalai alun ba adan menua nya.
Iya mega madahka Perintah Besai udah setuju enggau chara nya ngambi nyaga tanah Malaysia kelimpah minta saup sida ri sukut mayar ungkus jalai alun nya.
Terang iya, jalai alun ba adan menua ti diperambu tu mungkur sepanjai jalai Serian / Terian, jalai Engkilili/Lubok Antu, Jalai Song/adan menua, Jalai Baleh/ adan menua, Belaga/Jalai adan menua enggau jalai Tinjar/ adan menua.
“Naka tu, bisi tujuh CIQ di Sarawak lalu kitai deka numbuhka siti agi CIQ di Long Singgut, Kapit enggau Long Unai di Belaga,” ku iya.
Nangkan nya, Masing madahka Perintah Sarawak nerima semua perambu bekaul pengawa nyaga pengelantang ba adan menua.
“Aku meda timbal Dr Yii (Kaban Parlimen Bandar Kuching, Dr Kelvin Yii) ba surat kabar madahka perambu aku tu kelalu.
“Aku minta iya ngenataika perambu enggau ungkus nyikap jalai alun ba adan menua sereta sedia beratika baru perambu nya.
“Manah agi projek jalai alun ba adan menua tu mudah tang bisi kualiti.
“Aku mega minta iya beratika pekara ke nyadi ba menua tu begulai enggau bala iya sereta ngiga chara pemadu manah ungkup pengelikun di adan menua.
“Anang landik bejaku aja tang manah agi kita empu ngabas ngagai adan menua,” ku Masing nyemetak madah.

Suara Sarawak