SARATOK: Palan bemain ungkup nembiak mit ba Pasar Saratok deka diseleti berengkah ari taun 2020.
Pemangku Sekretari Kaunsil Pelilih Saratok (MDS) Bilong Engkas madah, semua atur besangkut enggau pengawa nyeleti palan nya benung diadu.
“Kebendar palan nya patut diseleti taun tu, tang laban (MDS) enda chukup jam alai mutar semua pekara bekait dikena ngatur semua utai ke diguna. Nya alai pengawa nyeleti semua palan bemain ti bisi ba Pasar Saratok deka berengkah digaga belabuh ari taun 2020 ila.”ku iya.
Iya madah munyi nya rambau Program Khidmat Komuniti ke diatur MDS ba Rumah Kuchun,Jabey Kabong, ensana.
“Nya alai aku minta ampun ngagai mensia mayuh sereta ngarapka sida ulih meretika penanggul tu. Sesebengkah langgur (projek) ari perintah enda ulih diadu tekala nya.
“Genap langgur pengawa ari MDS meseti nitihka atur ke endang dikena kami baka (Proses tinda) ngelamatu senentang ngatur tiap iti projek tauka pemansang.
“Agih belanja ari perintah enda baka kitai meli utai ngena duit ari kandi tanchut diri empu, semua endang bisi chara enggau atur ti patut dititih.
“Nya alai,aku minta mensia mayuh lebih agi sida ke endang begunaka palan nya besabar dulu,”ku iya.
Palan Bemain Nembiak Mit ba Pasar Saratok endang lama udah repuk sereta enda likun ke lalu berita senentang palan nya kala dipansutka ba surat kabar Suara Sarawak sebedau tu.
