SARATOK: Raban gawa diluan ti diasuh matau enggau nyaga sebuah palan kuarantin ditu udah nerima kereban dikena ngaduka pengawa beungkus RM2,000.
Sapit Menteri Pengeluar Kuasa enggau Pengeraja Asal ke mega Kaban Parlimen Saratok, Ali Biju madahka raban nya begunaka kereban gawa lebih agi lebuh sida dianjung gawa di luar opis.
Ku iya, tu dikena mantu sida nya ngereja pengawa enggau lantang sereta muntang agi laban nemu penyikap perengkaguna ba palan kuarantin endang kurang.
“Kitai naka ulih nyaup sida ke gawa nyaga pengelikun enggau pengerai mensia mayuh kelebih agi ba palan kuarantin.
“Nya alai kami udah berundingka kereban beguna amat dikena sida ngaduka pengawa baka komputer enggau mesin chelak.
“Tu bantu ke ulih dirumban jam ke diatu kelimpah bantu utai diguna ninting hari ungkup raban PUS enggau PUI ke dikuarantin ditu,” ku iya.
Jaku Ali nya dikenataika Pegawai Khas iya, Glen Anthony ari Palan Servis Komuniti Sitak Parlimen Saratok lebuh nyuaka bantu ba Palan Kuarantin Victoria Inn ditu, pagi Hari Enam nyin tadi.
Adun Krian nya madahka diri semampai matau utai ke nyadi ba menua nya lebih agi ngaul kes dirampit Covid-19 enggau kontak semak kes nya.
Berita penuh ba Ruai 4 sehari tu.