KUCHING: Palan Pengerai Prima Universiti Malaysia Sarawak (UNIMAS) disadang berengkah beoperasyen ba ujung taun tu.
Direktor Sepital Pengajar enggau Palan Berubat UNIMAS, Profesor Dr Ehfa Bujang Safawi madah, status pemadu baru ungkup renggat keterubah palan pengerai nya udah tembu 100 peratus.
“Naka diatu bisi dua renggat lalu renggat keterubah iya nya Palan Pengerai Prima UNIMAS ti baru tembu digaga enggau udah diserah Opis Kereja Raya (JKR) ngagai kami.
“Ila kitai deka ngatur program bejadi palan tu, Insya-Allah engka ba bulan Oktober tu.
“Renggat keterubah udah tembu 100 peratus lalu pengawa ngaga begunan besai sepital manggai lapan peratus,” ku iya.
Dr Ehfa mansutka jaku nya rambau dirandau pemberita ba Program KPT Prihatin MADANI ba Padang Futsal Kampung Sungai Maong ditu, sehari tu.
Palan pengerai nya Renggat Keterubah Projek Ngaga sereta Nembuka Sepital Pengajar enggau Palan Pengerai Prima UNIMAS ti deka nyadi sepital pengajar keterubah ba Sarawak ti beungkus RM485.988 juta mungkur taba 27.37 ikar (11.08 hektar) pemesai.
Dulu agi ari nya, renggat kedua sepital nya baka ti dipadahka Menteri Kereja Raya, Datuk Seri Alexander Nanta Linggi ti ngenukuka renggat kedua ngaga begunan besai Sepital Pengajar UNIMAS nyendia 300 katil ungkup servis pakar enggau servis ngenyit.
